Ռիքերի հեռացումը ամերիկյան քաղաքականության մեջ շատ բան չի փոխի: «Առաջին լրատվական»-ի հետ զրույցում նշեց ադրբեջանցի կոնֆլիկտաբան Արֆ Յունուսովը:
Ըստ կոնֆլիկտաբանի`ԱՄՆ-ն փորձելու է ակտիվացնել հայ-ադրբեջանական բանակցությունները. «Անցած տարի ԱՄՆ-ն ու Ֆրանսիան հուսով էին, որ Մինսկի խումբն ինչ-որ կերպ կգործի, բայց հիմա հարց է՝ այն առհասարակ գոյություն կունենա՞, թե՞ ոչ: Ռիքերի հեռացումն այն հարցը չէ, որ պետք է մտահոգություն առաջացնի, նոր ներկայացուցիչ կնշանակվի: Երբ բանակցությունները ընթանում են արևմուտքի հովանու ներքո, դրանք ավելի լայն համատեքստ են ստանում: Արևմուտքը փորձելու է կողմերին՝ առաջին հերթին Բաքվին, համոզել ստորագրել խաղաղության պայմանագիր առանց ՌԴ-ի:Հենց արևուտքի հովանու ներքո բանակցություններ են ընթանում, միջամտում է ՌԴ-ն ու փոխվում է ընթացքը: Եթե Բաքուն խաղադրույք է անում Մոսկվայի վրա, Երևանը խաղադրույք է անում արևմուտքի վրա»:
Կոնֆլիկտաբանը կարծում է, որ Մոսկվան շատ դժգոհ է Հայաստանից, դրա համար էլ գործում է Ադրբեջանի հետ համատեղ. «Պուտինն ու Փաշինյանը դաշնակիցներ չեն, այլ բան են Ալիև-Պուտին հարաբերությունները: Ադրբեջանը սկզբում լավ ընդունեց Ռուբեն Վարդանյանի գալը, նոյեմբերին իրավիճակ փոխվեց: Այս շրջափակումը ճնշում է ոչ այնքան Արցախի, որքան Հայաստանի վրա: Եթե իրերն իրենց անուններով կոչենք՝ 2020թ․-ի պատերազմն էլ Ալիևի նախաձեռնությունը չէր: Ալիևը 44 օրյա պատերազմի համաձայնությունը Կրեմլից ստացել է դեռևս 2019 թ. Մեհրիբան-Պուտին հանդիպման ժամանակ: Մինչև գարուն Ադրբեջանը կգնա նոր էսկալացիայի՝ Մոկվայի դրդմամբ»:
