Ռուսաստանի, Թուրքիայի և Սիրիայի արտաքին գործերի նախարարների հանդիպումը կարող Է առաջիկա օրերին անցկացվել ԱՄԷ-ում: Այս մասին տեղեկանում է РИА Новости գործակալությունից: Նշվում է, որ թուրքական աղբյուրները եռակողմ հանդիպումը ԱՄԷ-ում անցկացնելու հավանականության մասին հայտնել են RT Arabic հեռուստաալիքին:
Դեկտեմբերի 4-ին Սիրիայի նախագահ Բաշար Ասադը բանակցություններ է վարել ԱՄԷ-ի արտաքին գործերի և միջազգային համագործակցության նախարար Աբդուլլահ բեն Զեյդ ալ Նահայյանի հետ, որն այցով Դամասկոս Էր ժամանել Էմիրությունների պատվիրակության գլխավորությամբ: Թուրքիայի արտաքին գործերի նախարար Մևլութ Չավուշօղլուն ավելի վաղ հայտարարել էր, որ Անկարան Թուրքիայի և Սիրիայի ԱԳ նախարարների հանդիպումն առաջարկել է անցկացնել հունվարի երկրորդ կեսին. հանդիպումը, ըստ նրա, հնարավոր է երրորդ երկրում, այդ թվում՝ Ռուսաստանում։
Ինչպես ավելի վաղ հայտնել էր «Արմենպրես»-ը՝ Թուրքիայի նախագահ Ռեջեփ Թայիփ Էրդողանը «Արդարություն և զարգացում» կուսակցության տարածքային կառույցների ղեկավարների հետ ընդլայնված հանդիպման ժամանակ հնարավոր է համարել Սիրիայի նախագահ Բաշար Ասադի հետ հանդիպումը: Նա հույս է հայտնել, որ կկազմակերպվի արտգործնախարարների եռակողմ հանդիպումը, որից հետո, ըստ իրավիճակի՝ երկրների ղեկավարների հանդիպումը:
Դեկտեմբերին Ռուսաստանում կայացել են Թուրքիայի և Սիրիայի պաշտպանության նախարարների միջև 11 տարվա ընթացքում առաջին պաշտոնական բանակցությունները։ 2011 թվականին Սիրիայում սկսված քաղաքացիական պատերազմի ընթացքում Թուրքիան, որը մինչ այդ սերտ հարաբերություններ էր պահպանում Դամասկոսի հետ, հանդես եկավ Սիրիայի նախագահ Բաշար Ասադի հակառակորդների կողմում։ Այդ ժամանակվանից ի վեր Թուրքիայի հարաբերությունները Սիրիայի հետ մնում են լարված։ Սակայն վերջին շաբաթներին երկու կողմերը, ինչպես նաև առանձին լրատվամիջոցներ, սկսել են խոսել հարաբերությունների աստիճանաբար կարգավորման հնարավորության մասին։