Ավստրալիան ԱՄՆ-ից կգնի HIMARS ՀԿՌՀ (համազարկային կրակի ռեակտիվ համակարգ), որի արդյունավետության մասին վերջին ամիսներին հայտնել է Ուկրաինայի բանակը:
Այս մասին հաղորդել Է ավստրալական ABC News հեռուստաալիքը։ Հաղորդվում է, որ երկրի կառավարությունը նաև գործարք Է կնքել հաջորդ տարի ավստրալական ռազմանավերի համար նորվեգական Naval Strike Missile հրթիռներ (NSM) ձեռք բերելու շուրջ: «Ավստրալական բանակը գործողության հեռահար շառավիղ ունեցող աննախադեպ հարվածի հնարավորություն կստանա ամերիկյան HIMARS համակարգ գնելու շնորհիվ… (խմբ.՝ Վարչապետ Էնթոնի) Ալբանիզի կառավարությունը համաձայնագիր է կնքել մինչև 2026 թվականը բեռնատարի վրա տեղադրված քսան ՀԿՌՀ գնելու մասին», – գրում է ABC-ն:
Կառավարությունից լրատվամիջոցին հայտնել են, որ գնումների ընդհանուր գումարը կազմում է 1-ից մինչև 2 միլիարդ ավստրալական դոլար (681,5 միլիոնից մինչև 1,36 միլիարդ ԱՄՆ դոլար)։ Գնումների հստակ գինը չի հաղորդվում: Հոկտեմբերին ԱՄՆ կատարած այցի ընթացքում Ավստրալիայի պաշտպանության նախարար Փեթ Քոնրոյը հայտնել էր, որ արդյունավետ բանակցություններ է վարել այն հարցի շուրջ, թե ինչպես Ավստրալիան կարող է սկսել HIMARS համակարգերում օգտագործվող հրթիռներ արտադրել: 2022 թվականի դեկտեմբերի վերջին Australian թերթը հաղորդել էր, որ Ասիա-խաղաղօվկիանոսյան տարածաշրջանում Չինաստանի ակտիվությունն ուժեղացնելու ֆոնին Ավստրալիայի կառավարությունը քննարկում է նոր հրթիռային համակարգ ստեղծելու հնարավորությունը՝ երկրի հյուսիսային շրջանները պաշտպանելու նպատակով:
HIMARS համազարկային կրակի ռեակտիվ համակարգը մշակվել է ԱՄՆ-ում BAE Systems և Lockheed Martin ընկերությունների կողմից 1996-2000 թվականներին, արտադրվում Է 2003 թվականից։ Այն ստեղծվել է ԱՄՆ բանակի FMTV եռասռնի անվավոր շասսիի հիման վրա, կարող է կրել վեց ռեակտիվ արկ կամ մեկ ATACMS օպերատիվ-մարտավարական բալիստիկ հրթիռ, զինամթերքի առանձին տեսակների համար հրաձգության թիրախային հեռահարությունը մինչև 80 կիլոմետր է: