Հայաստանի քննչական կոմիտեի նախագահ Արգիշտի Քյարամյանն օրերս հարցազրույց է տվել Հանրային հեռուստաընկերությանը, որտեղ անդրադարձել է 44-օրյա պատերազմի վերաբերյալ հարուցված քրեական վարույթներին և թե ինչու են դրանք ձգձգվում։ Նա նշել է, որ ձգձգման մասին խոսելից պետք է անդրադառնանք երկու գործոնի՝ վարույթների ծավալին և վարույթների քննության որակին:
«Եթե մենք ծավալային առումով ենք քննարկում պատերազմի վերաբերյալ քննվող քրեական գործերը, ապա ես պետք է նշեմ, որ շատ դետալային քննություն է իրականացվում, և մենք քննության շատ լայն շրջանակ ենք վերցրել, որպեսզի կարողանանք ամբողջությամբ բացահայտել հանրությանը և քննությանը հետաքրքրող բոլոր հարցերը: Որպեսզի ավելի պատկերավոր լինի, պետք է նշեմ, որ մենք ընդհուպ դիվիզիայի մակարդակից մինչև վաշտի մակարդակ քննություն ենք անում, կորպուսի մակարդակից մինչև երբեմն դասակի մակարդակ քննություն ենք իրականացնում: Քննության այս բազմաշերտությունը պայմանավորված է նրանով, որ մեր նպատակն ամբողջությամբ պարզաբանելն ու բացահայտելն է պատերազմում մեր պարտության պատճառները և այն անձանց, որոնք նպաստել են այդ պարտության վրա հասնելուն»,- ասել է նա։ Քյարամյանի խոսքով՝ 44-օրյա պատերազմի վերաբերյալ հարուցված քրեական գործերով հարցաքննվել է շուրջ 17 հազար մարդ:
Մենք պատերազմի վերաբերյալ քրեական գործերը բաժանել ենք երկու մասի՝ սպաների վերաբերյալ քրեական գործեր և շարքային անձնակազմի վերաբերյալ քննվող քրեական գործեր: Առանձին քրեական գործով է քննվում Շուշիի անկման դրվագը: Առանձնացված վարույթով է քննվում նաև բոլորին հայտնի հոկտեմբերի 7-8-ի օպերացիայի վերաբերյալ գործը: Մենք ունենք քրեական գործ, որը վերաբերվում է նախապատերազմական իրադրությանը, որը շատ կարևոր քրեական գործ է: Ունենք քրեական գործ պատերազմի ընթացքում և պատերազմից առաջ զորահավաքի կազմակերպման հարցերին վերաբերվող: Այս բոլոր քրեական գործերը իրենց մեջ ներառում են հարյուրավոր, երբեմն նույնիսկ հազարավոր դրվագներ»,- ասել է Քյարամյանը:
ԱԺ պաշտպանության և անվտանգության հարցերի մշտական հանձնաժողովի անդամ, ՔՊ խմբակցության պատգամավոր Գագիկ Մելքոնյանն «Առաջին լրատվական»-ի հետ զրույցում նշեց, որ 44-օրյայի հետ կապված մի քանի պրոցես միանգամից է ընթանում․ «Հիմա 10․000-ից ավելի փաստաթղթեր գտնվում են ԱԺ քննիչ հանձնաժողովում, դրանք մանրամասն օգտագործվում են, և որտեղ քրեական գործ է ի հայտ գալիս, միանգամից դատախազություն է ուղարկվում։ Կարճ ժամանակ անց փաստաթղթերի ուսումանասիրությունը կավարտվի և արդեն կսկսվի հարցաքննության փուլը»,-հավելեց Մելքոնյանը։
Նա նշեց, որ 44-օրյա պատերազմի պարտության հետ կապված տարբեր տեսակի քրեական գործեր են հարուցված և այդ գործերն արդեն հարցաքննվում են, դրանք հիմնականում քննչական վարույթում են․ «Մենք դրանցից տեղյակ չենք, մեր գործն ուսումնասիրություններն են։ Սա շատ ծանր և տևական գործ է, դրա համար էլ այսքան ձգձգվում է, և կա կամք այն բացահայտելու։ Եթե չլիներ կամք, քննիչ հանձնաժողով չէր ստեղծվի»,-ասաց նա։
Մելքոնյանի խոսքով՝ 44-րյա պատերազմի հանգամանքները քննող քննիչ հանձնաժողովը երբ փաստաթղթերում տեսնում է, որ գործեր կան, որտեղ քրեական գործեր պետք է հարուցվեն, որտեղ հանցակազմ կա, միանգամից ուղարկում է քննչական․«44-օրյա դատական պրոցեսներ են գնում, մարդիկ դատվում են, կան գեներալներ, որոնց գործերը դատարաններում են, այնպես որ ամեն ինչ արվում է, որ բացահայտվի»,-ասաց նա։
Պարտության պատճառները, պատգամավորի խոսքով, դեռ ամբողջովին պարզ չեն, և մինչև ամբողջովին չուսումնասիրվեն, մինչև մարդիկ չտան կարևորագույն հարցերի պատասխանները, ոչ մի բան էլ պարզ չի դառնա․
«Իհարկե, ես պատերազմի ժամանակ եղել եմ տեղում, իհարկե, բացթողումները շատ են եղել»,-ասաց Մելքոնյանը։
Պատերազմում պարտությունը, նրա խոսքով, եղել է մեր ԳՇ ոչ որակով աշխատանքը․«Հիմա շատ բան է փոխվել, բայց արդյունավետությունը պետք է բարձրանա, միայն կադրերին փոխելը չէ։ Արդյունավետությունը պետք է բարձրանա, այնպես չէ, որ մեկին հանեցին, խնդիրը լուծվեց, պետք է ընդհանուր բարձրագույն սպայական կազմի մեջ լրջագույն փոփոխություններ լինեն, պետք է աշխատեն»։
Մելքոնյանի խոսքով՝ շատ շուտով քննիչ հանձնաժողովում նյութերի ուսումնասիրության փուլը կավարտվի, կսկսվի հանձնաժողով հրավիրյալների ցանկի ամբողջացման գործընթացը։
