ԱՄՆ-ը հայտնել է Կովկասի հարցերի գլխավոր բանակցողի պաշտոնից Ֆիլիպ Ռիքերի հեռանալու մասին: Ֆիլիպ Ռիքերը այդ պաշտոնին նշանակվեց 2022 թվականի օգոստոսին, ինչը գրավեց բավականին զգալի ուշադրություն, նաև այն պատճառով, որ Ֆիլիպ Ռիքերը մինչ այդ զբաղեցրել էր ԱՄՆ պետքարտուղարի Եվրասիայի ու Եվրոպայի հարցերի տեղակալի պաշտոն և հեղինակավոր ու բավականին փորձառու դիվանագետի նշանակումը թույլ էր տալիս դիտարկել, որ ԱՄՆ-ը բավականին լուրջ դիվանագիտական ջանք է կենտրոնացնելու Կովկասի ուղղությամբ:
Այդ համատեքստում էր դիտվում նաև հայ-ադրբեջանական խնդիրը, արցախյան հարցը, հաշվի առնելով և այն, որ Կովկասի հարցերի գլխավոր բանակցողը ըստ էության նաև Մինսկի խմբի համանախագահ էր, թեև խումբը դե ֆակտո չէր աշխատում և ԱՄՆ պետքարտուղարությունը Ռիքերի առումով գործածում էր հենց Կովկասի հարցերի գլխավոր բանակցող ձևակերպումը: Միևնույն ժամանակ, Ռիքերի նշանակմանը զուգահեռ, և դրան հաջորդած ամիսներին ԱՄՆ աշխուժությունը կովկասյան ուղղությամբ բավականին շոշափելի էր: Այդ առումով, Ռիքերի հեռանալու առնչությամբ առաջանում են իհարկե հարցեր, թե արդյո՞ք դա կարող է նշանակել ԱՄՆ առաջնահերթությունների փոփոխություն, նաև աշխուժության նվազում, ինչը իր հերթին կարող է բերել որոշակի տրանսֆորմացիաների ռեգիոնալ իրավիճակի առումով:
Ռիքերը հեռանում է, որովհետև արե՞լ է իր գործը, թե՞ ԱՄՆ-ը նրանից սպասում էր ավելին և նրա հեռացումը նշանակելու է ոչ թե Վաշինգտոնի աշխուժության նվազում, այլ գործնականում հակառակը՝ ավելի արդյունավետ աշխատանքի ակնկալիքով նոր նշանակման հեռանկար: Սրանք էական հարցեր են, քանի որ կարող են տալ հետագա հնարավոր սցենարների առնչությամբ որոշակի «բանալիներ»: Այդ ամենն իհարկե կպահենք մեր ուշադրության կենտրոնում, առայժմ արձանագրելով, որ Կովկասի հարցերի գլխավոր բանակցողի պաշտոնում Ֆիլիպ Ռիքերի վերջին ռեգիոնալ այցը եղել է դեկտեմբերի սկզբին, երբ նա եղավ երեք մայրաքաղաքներում՝ Բաքվում, Թբիլիսիում, Երևանում: Ընդ որում, նկատենք, որ Լաչինի հանդեպ ադրբեջանական գործողությունները սկսեցին այն ժամանակ, երբ Ռիքերը Բաքու այցից հետո գտնվում էր դեռևս Երևանում:
