Հայաստանի քննչական կոմիտեի նախագահ Արգիշտի Քյարամյանը համաձայն չէ դիտարկման հետ, որ 44-օրյա պատերազմի վերաբերյալ հարուցված քրեական վարույթները ձգձգվում են: Քյարամյանն այս մասին ասել է Հանրային հեռուստաընկերությանը տված հարցազրույցում:
«Վարույթների ձգձգման մասին խոսելիս՝ նախ պետք է անդրադառնանք երկու գործոնի՝ վարույթների ծավալին և վարույթների քննության որակին: Եթե մենք ծավալային առումով ենք քննարկում պատերազմի վերաբերյալ քննվող քրեական գործերը, ապա ես պետք է նշեմ, որ շատ դետալային քննություն է իրականացվում, և մենք քննության շատ լայն շրջանակ ենք վերցրել, որպեսզի կարողանանք ամբողջությամբ բացահայտել հանրությանը և քննությանը հետաքրքրող բոլոր հարցերը: Որպեսզի ավելի պատկերավոր լինի, պետք է նշեմ, որ մենք ընդհուպ դիվիզիայի մակարդակից մինչև վաշտի մակարդակ քննություն ենք անում, կորպուսի մակարդակից մինչև երբեմն դասակի մակարդակ քննություն ենք իրականացնում: Քննության այս բազմաշերտությունը պայմանավորված է նրանով, որ մեր նպատակն ամբողջությամբ պարզաբանելն ու բացահայտելն է պատերազմում մեր պարտության պատճառները և այն անձանց, որոնք նպաստել են այդ պարտության վրա հասնելուն»,- մանրամասնել է Քյարամյանը:
Նա հայտնեց, որ 44-օրյա պատերազմի վերաբերյալ հարուցված քրեական գործերով հարցաքննվել է շուրջ 17 հազար մարդ: «Մենք պատերազմի վերաբերյալ քրեական գործերը բաժանել ենք երկու մասի՝ սպաների վերաբերյալ քրեական գործեր և շարքային անձնակազմի վերաբերյալ քննվող քրեական գործեր: Առանձին քրեական գործով է քննվում Շուշիի անկման դրվագը: Առանձնացված վարույթով է քննվում նաև բոլորին հայտնի հոկտեմբերի 7-8-ի օպերացիայի վերաբերյալ գործը: Մենք ունենք քրեական գործ, որը վերաբերվում է նախապատերազմական իրադրությանը, որը շատ կարևոր քրեական գործ է: Ունենք քրեական գործ պատերազմի ընթացքում և պատերազմից առաջ զորահավաքի կազմակերպման հարցերին վերաբերվող: Այս բոլոր քրեական գործերը իրենց մեջ ներառում են հարյուրավոր, երբեմն նույնիսկ հազարավոր դրվագներ»,- նշեց Արգիշտի Քյարամյանը:
Քննչական կոմիտեի նախագահը վստահեցրեց, որ 44-օրյա պատերազմի վերաբերյալ հարուցված քրեական գործերով կատարվող քննության որակին շատ մեծ ուշադրություն է դարձվում: Նրա խոսքով՝ շատ հստակ խնդիր է դրված, որ այս գործերով պետք է 100 տոկոսանոց հիմնավորվածություն և ներքին համոզմունք ունենան, որպեսզի կարողանան գործերի ընթացքը լուծել: «Ցանկացած փաստ մի քանի անգամ ստուգվում և վերստուգվում է»,- նշեց քննչական կոմիտեի նախագահը:Արգիշտի Քյարամյանը նշեց, որ կան շուրջ 7 տասնյակից ավել սպաներ, որոնք քրեական գործերով ներգրավված են որպես մեղադրյալներ: «Դատավճիռներ, որքանով որ ես տեղյակ եմ, չկան»,- ասաց նա:
