Պետքարտուղարությունը ասում է, որ տրանսատլանտյան միասնությունը խաթարելու Մոսկվայի ծրագրերը հակադարձ արդյունք են տվել
ԱՄՆ-ը Ռուսաստանին կոչ է արել դադարեցնել հարձակումները Ուկրաինայում և դուրս բերել զորքերը՝ Մոսկվային մեղադրելով ուկրաինացի ժողովրդին անհավանական տառապանքներ պատճառելու մեջ։
«Մենք կոչ ենք անում Ռուսաստանին դադարեցնել հարձակումները, դուրս բերել զորքերը Ուկրաինայից և հայտարարել 2023 թվականին խաղաղության հաստատման իր հավատարմության մասին», – ասել է պետքարտուղարության խոսնակ Նեդ Փրայսը:
Նա նշել է, որ անցյալ տարվա փետրվարի 24-ին Ուկրաինա լայնածավալ ներխուժման մեկնարկից ի վեր սպանվել են, հաշմանդամ դարձել կամ վիրավորվել Ուկրաինայի հազարավոր քաղաքացիներ, իսկ շատերը դարձել ռուսական ուժերի հանցագործությունների և վայրագությունների զոհ։
Փրայսն ասել է, որ նախագահ Պուտինի սանձազերծած պատերազմը նաև ստիպել է միլիոնավոր մարդկանց լքել իրենց տները: Ներկայումս Ուկրաինայում կա 5,9 միլիոն ներքին տեղահանված անձ և ավելի քան 7,8 միլիոն փախստական, ովքեր լքել են երկիրը:
«Սակայն տրանսատլանտյան միասնությունը պառակտելու Կրեմլի ծրագրերը հակառակ արդյունք տվեցին», – նշել է Փրայսը: «Մենք անհամբեր սպասում ենք, որ Ֆինլանդիան և Շվեդիան միանան ՆԱՏՕ-ի ընդլայնված դաշինքին, որն ավելի ուժեղ և կենտրոնացած է, քան երբևէ: ԵՄ-ը և ՆԱՏՕ-ն լիովին հավատարիմ են Ուկրաինային աջակցելուն»:
Նա հիշեցրել է, որ նախագահ Բայդենը դեկտեմբերի 29-ին ստորագրել է Ուկրաինայի լրացուցիչ հատկացումների մասին օրենքը, որը նախատեսում է 44,9 միլիարդ դոլարի արտակարգ ֆինանսավորում՝ Ուկրաինային և մյուս գործընկերներին աջակցելու, ինչպես նաև պատերազմի գլոբալ հետևանքները վերացնելու համար:
Թեև տոներն ավանդաբար տոնակատարությունների և խաղաղության ժամանակներ են, Ռուսաստանը որոշել է ակտիվացնել ձմեռը օգտագործելու իր արշավը՝ Ուկրաինայի ժողովրդին հրթիռային հարվածներ հասնելու միջոոցով, որի արդյունքում շարքից դուրս են գալիս քաղաքների կարևոր ենթակառուցվածքները, ասել է Փրայսը:
«Սակայն ուկրաինացիների սրտերում վախ և հուսահատություն սերմանելու Կրեմլի փորձերը ձախողվում են։ Սիրենների և առօրյա կյանքի անորոշության պայմաններում ուկրաինացի ժողովուրդը մեծարում է իր հերոսներին և տոնում հաջողություններ ռազմի դաշտում»։
«Մենք կաջակցենք Ուկրաինային այնքան ժամանակ, որքան դա կպահանջվի»,- եզրափակել է Փրայսը։
Միևնույն ժամանակ, Ռուսաստանի պաշտպանության նախարարությունը հայտնել է, որ բջջային հեռախոսների «զանգվածային օգտագործումը» հանգեցրել է ուկրաինական մահացու հարվածի Արևելյան Ուկրաինայի Մոսկվայի կողմից վերահսկվող քաղաքներից մեկում, որտեղ տեղակայված էին ռուսական զորքերը: Հարվածը հասցվել է Ամանորի գիշերը:
«Արդեն ակնհայտ է, որ տեղի ունեցածի հիմնական պատճառը եղել է անձնակազմի կողմից, հակառակ արգելքին, բջջային հեռախոսների զանգվածային օգտագործումը հակառակորդի զենքի հասանելիության սահմաններում»,- ասված է զեկույցում։ «Այս գործոնը թույլ է տվել հակառակորդին հայտնաբերել և որոշել հրթիռային հարված հասցնելու համար ռազմական անձնակազմի գտնվելու վայրի կոորդինատները»:
Ուկրաինան ստանձնել է Մակեևկայի վրա հարձակման պատասխանատվությունը: Ռուսական ուժերը վերահսկում են քաղաքը և արհեստագործական դպրոցի շենքը վերածել էին զորանոցի։
Սկզբում հաղորդվում էր 63 ռուս զինվորականի մահվան մասին, սակայն ռուս գեներալ-լեյտենանտ Սերգեյ Սևրյուկովը չորեքշաբթի գիշերը նախարարության կողմից հրապարակված տեսաուղերձում ասել է, որ զոհերի թիվը հասել է 89-ի:
Նրա խոսքով՝ շենքի փլատակների տակ նոր դիակներ են հայտնաբերվել, հաղորդում է AFP գործակալությունը։
