WikiLeaks-ի` Հայաստանին վերաբերող հերթական բացահայտումներից մեկը կապված է 2008թ.-ի մարտիմեկյան իրադարձությունների հետ: Գաղտնի փաստաթղթում, որը թվագրված է 2008թ.-ի փետրվարի 28-ով, խոսվում է այն մասին, որ Ռոբերտ Քոչարյանի պնդմամբ՝ որոշ ընդդիմադիրների ձերբակալություններն անհրաժեշտ էին, քանի որ միայն այդ տարբերակով էր հնարավոր կանխել հետընտրական բռնությունները:
Ըստ Քոչարյանի` փետրվարի 22-ին ընդդիմադիրները զինված հեղաշրջում էին փորձում կատարել, որը, սակայն, հաջողությամբ կանխվել է: ՀՀ երկրորդ նախագահը նաև նշել է, որ ԱՄՆ արձագանքը նախագահական ընտրություններին շատ անարդար էր, հատկապես Վրաստանում անցկացված վերջին ընտրությունների հետ համեմատած, քանի որ Հայաստանում ընտրություններն անցել են շատ ազնիվ և թափանցիկ մթնոլորտում, նկատվել են ընդամենը մի քանի աննշան խախտումներ, որոնք ուղղվել են: Քոչարյանի համոզմամբ՝ 2008թ.-ի նախագահական ընտրությունները լավագույնն էին Հայաստանի պատմության մեջ:
