Իրանը միշտ սերտորեն և լրջորեն համագործակցել է Ատոմային էներգիայի միջազգային գործակալության (ՄԱԳԱՏԷ) հետ և կշարունակի այդ համագործակցությունը, հայտնել է Իրանի փոխարտգործնախարար Ալի Բաղերին՝ իրանցի գեներալ Ղասեմ Սոլեյմանիի սպանության 3-րդ տարելիցին նվիրված միջոցառումից հետո պատասխանելով լրագրողների հարցերին:
Այս մասին տեղեկանում է Tasnim լրատվական գործակալությունից: «Որպես ՄԱԳԱՏԷ-ի անդամ և Միջուկային զենքի չտարածման պայմանագրի պատասխանատու կողմ, ինչպես նաև այս ոլորտում միջուկային ներուժ, միջուկային գիտելիքներ և միջուկային տեխնոլոգիաներ ունեցող երկիր՝ Իրանի Իսլամական Հանրապետությունը միշտ լրջորեն և արդյունավետ կերպով համագործակցել է ՄԱԳԱՏԷ-ի հետ և անպայման կշարունակի այդ համագործակցությունն ապագայում», – գործակալությունը մեջբերում է Բաղերիի խոսքը։
Իրանի փոխարտգործնախարարն անդրադարձել է Գերմանիայի և Միացյալ Նահանգների վերջին հայտարարություններին, որ 2015 թ.-ի միջուկային համաձայնագրի վերականգնումը նրանց համար այլևս կարևոր չէ: Բաղերին, որը Գործողությունների համատեղ համապարփակ ծրագրի (ԳՀՀԾ) վերականգնման հարցով Իրանի գլխավոր բանակցողն է, հայտարարել է, որ գործարքը վերականգնելու շուրջ բանակցությունները շարունակական գործընթաց են:
«Դրա մեթոդները, գուցե, ժամանակ առ ժամանակ փոխվել են, բայց գործընթացը շարունակվում Է», – ասել Է նա։ ԱՄՆ-ի նախկին նախագահ Դոնալդ Թրամփը 2018 թ.-ին միակողմանիորեն Վաշինգտոնը դուրս բերեց ԳՀՀԾ-ից և վերականգնեց Իրանի դեմ խիստ տնտեսական պատժամիջոցները: Ի պատասխան՝ Իրանն աստիճանաբար հրաժարվեց միջուկային համաձայնագրի որոշ պայմաններից:
ԱՄՆ ներկայիս նախագահ Ջո Բայդենը հայտարարել է գործարքին որոշակի պայմաններով վերադառնալու իր պատրաստակամության մասին։ 2021 թ.-ի ապրիլից Իրանը, Մեծ Բրիտանիան, Գերմանիան, Չինաստանը, Ֆրանսիան և Ռուսաստանը Վիեննայում բանակցությունների մի քանի փուլ են անցկացրել՝ նպատակ ունենալով վերականգնել ԳՀՀԾ-ն։ ԱՄՆ-ն ուղղակիորեն չի մասնակցում բանակցություններին։ 2022 թ.-ի օգոստոսից բանակցությունները փակուղի են մտել:
