Իսպանիայի ոստիկանությունը երկրի հարավարևելյան Ալիկանտե նահանգի երկու տներից հարյուրավոր հնագիտական արտեֆակտներ է հայտնաբերել, այդ թվում՝ ծովային բրածոներ, բրոնզեդարյան կերամիկա և 18-րդ դարի զենքեր: Այս մասին հաղորդում է CNN-ը:
Տներից առգրավվել են նաև ավելի քան 200 մարդկային ոսկորների մնացորդներ, որոնցից մի քանիսը 4000-ից 5000 տարվա հնություն ունեն: Հայտնաբերված 350 հնագիտական արտեֆակտների թվում են հռոմեական խճանկարների սալիկներ, պալեոլիթյան կայծքարե գործիքներ և պատմական զենքեր, այդ թվում՝ թնդանոթներ և երկաթե նռնակ:
Բացահայտմանը նախորդել է մի քանի շաբաթ տևած հետաքննությունը՝ հայտնի որպես «Գործողություն Օսարիում», որի շնորհիվ ոստիկաններին հաջողվել է գտնել Ալիկանտեի «ամենամեծ անօրինական մասնավոր հավաքածուներից մեկը»: Ըստ Իսպանիայի քաղաքացիական գվարդիայի տարածած հաղորդագրության՝ այժմ հետաքննություն է ընթանում երկու տղամարդկանց նկատմամբ՝ գեղարվեստական, պատմական, մշակութային կամ գիտական արժեք ներկայացնող իրերի յուրացման համար։
Գատա դե Գորգոս գյուղում արտեֆակտների մի մասի հայտնաբերումից հետո տան սեփականատերը համագործակցել է ոստիկանության հետ և նրանց ցույց տվել ավելի մեծ հավաքածուն, որը գտնվում էր մոտակա Դենիա քաղաքում:
Երկրորդ տան բնակիչը հայտնել է, որ հայտնաբերված հնագիտական իրերը ժառանգել է մահացած ազգականից, թեև, ըստ հաղորդագրության, ոստիկանությունը չի գտել որևէ փաստաթուղթ, որը կհիմնավորի նրա մոտ արտեֆակտների գտնվելը: Քննիչները, սակայն, գտել են նոթատետրեր, որոնցում հանգուցյալ ազգականը ձեռագիր նշումներ էր արել և հայտնել, թե որտեղից են այդ իրերը:
Իսպանիայի քաղաքացիական գվարդիան հայտնել է, որ ցանկանում է համագործակցել մշակութային գերատեսչության պաշտոնյաների հետ՝ իրերն ուսումնասիրելու և դասակարգելու համար:
Լրատվամիջոցը հաղորդում է, որ անցյալ տարի Իսպանիայի քաղաքացիական գվարդիան Վալենսիայի նավահանգստում հայտնաբերել էր 2014 թվականին հնագիտական վայրերից մաքսանենգ ճանապարհով դուրս բերված 36 անտիկ իրեր և դրանք վերադարձրել Եգիպտոսին:
