Արսեն Թորոսյանը ֆեյսբուքյան իր էջում գրել է. «Սիրելի հայրենակիցներ,
Սովորաբար տարվա վերջը անցնող տարին վերլուծելու, եզրահանգումներ անելու և նոր տարին գծագրելու ամենապատեհ ժամանակն է, չնայած որ օրացույցային տարին ինքնին պայմանականություն է և միշտ է պետք վերլուծել անցյալը և պլանավորել ապագան:
Անցնող 2022 թվականը լի էր մեր երկրի դեմ եղած մարտահրավերներով, գրեթե ինչպես 2020 և 2021 թվականները և այդ առումով այն կարծես թե շարունակություն էր դեռ երեք տարի առաջ սկսված մի քարքարոտ ճանապարհի, որի ընթացքում մենք բազմաթիվ կորուստներ ունեցանք` թե’ մարդկային, թե’ այլ տեսակի: Եվ հենց այդ առումով էլ այն կրկին պայքարի և դիմադության տարի էր ավելի շատ, քան թե պարզապես զարգացման և բարգավաճման:
Ցավոք սրտի մարդակային կորսված կյանքերը ետ բերել չի լինելու և մենք բոլորս սգում և փառավորում ենք մեր ընկած հերոսներին, ովքեր իրենց ամենաթանկ բանը չխնայեցին մեր պետությունը թեկուզ խոցված, բայց կանգուն պահելու համար:
Կորուստների և երբեմն անհաղթահարելի թվացող դժվարությունների հետ մեկտեղ իհարկե եղել են նաև հաջողություններ, երբեմն «աննախադեպ» գնահատականի արժանի, հատկապես տնտեսական ոլորտում, ինչպես նաև մի շարք ոլորտային բարեփոխումների շրջանակներում, որոնց շատ ենք անդրադարձել:
2023 թվականը գծագրելիս, մենք պետք է դասեր քաղելով մեր անհաջողություններից և հենվելով մեր հաջողությունների վրա առաջ գնանք` ավելի անկախ, ավելի ժողովրդավար և ավելի ինքնիշխան պետություն կառուցելով, ինչը սակայն հեշտ չէ և պահանջում է հաստատակամություն, ողջախոհություն և ճկունություն ներքին ու արտաքին քաղաքականության շատ հարցերում:
Մենք պետք է առաջինը ինքներս փոխվենք, որպեսզի կարողանանք փոխել մեր շուրջ գտնվող աշխարհը` սկսած մեր հարազատ բակից և վերջացնելով մեր տարածաշրջանով: Ինչքան էլ որ մեզ փորձեն շեղել մեր այդ փոխվելու և ավելի լավը դառնալու ուղուց, մենք չպետք է ընկրկենք, պետք է մնանք տոկուն և անհաղորդ այդ դեստրուկտիվ գործոններին, որոնք ուզում են մեզ որպես պետություն և անհատ տեսնել թույլ, մշտապես հյուծված, կոնֆլիկտների մեջ թաղված և անընդունակ: Չպետք է վհատվենք, և մեր մեջ ուժ գտնելով, իմաստուն ու կշռադատված գործողություններով զարգացնենք մեր երկիրը:
Ուժ և տոկունություն եմ ցանկանում բոլորիս այս նոր տարում:
Շնորհավոր ԱՄԱՆՈՐ!!!»:
