2022-ը փակում ենք բավականին լուրջ մարտահրավերներով: «Առաջին լրատվական»-ի հետ զրույցում նշեց Հանուն Հանրապետության կուսակցության նախագահ Արման Բաբաջանյանը:
Ըստ Բաբաջանյանի` բաց թողնված հնարավորությունները մեզ բերել հասցրել են այս հանգրվանին. «ՌԴ լուռ ու երբեմն ոչ լուռ համաձայնությամբ ռազմական ագրեսիայի սպառնալիք է Հայաստանի ուղղությամբ: ԱԽ քարտուղարի վերջին հայտարարությունը ՌԴ-ից եկող ճնշումների մասին այլ դրվագ ուներ: ՌԴ-ն ռազմական ճնշմամբ փորձում է հասնել Հայաստանի` միութենական պետության մաս դառնալուն: Ադրբեջանը օգտագործվում է ՌԴ-ի կողմից որպես բութ գործիք ընդդեմ Հայաստանի: Ցանկացած կորուստ սահմանին դիվանագիտական անհաջողության հետևանք է: Ունեցել ենք ակտիվ դիվանագիտական տարի, բայց դա բավարար չէր կորուստներ չունենալու համար: Հայտարարությունների սրությունը բացահայտում է մի բան` փակ սենյակներում համաձայնության չեն հասնում»:
Բաբաջանյանի խոսքով` ՀՀ իշխանությունը այնպիսի վիճակում է հայտնվել, որ բացահայտ խոսում է ՌԴ-ի սպառնալիքների մասին. «Լուծումները այս ճարտարապետության սահմաններում գոյություն չունեն: Մեզ համար վտանգ ստեղծող անվտանգային կենտրոնից անվտանգություն ենք ուզում: Վախերը պարալիզացրել են մեր միտքն ու բանականությունը: Եթե խոսում ենք ՌԴ-ից եկող ճնշումների մասին, ապա ՀԱՊԿ-ից դուրս գալը միայն բավարար չէ»:
