Պենտագոնը հայտարարել Է, որ Սիրիայում «Իսլամական պետություն» ահաբեկչական խմբավորման դեմ գործողությունների ակտիվացման շրջանակներում դեկտեմբերին իրականացրել է առնվազն 10 ուղղաթիռային և ցամաքային գործողություն զինյալների պարագլուխներին ոչնչացնելու կամ բռնելու համար: : Այդ մասին հաղորդում է The Wall Street Journal պարբերականին:
Ըստ ԱՄՆ-ի կենտրոնական հրամանատարության ներկայացուցիչների՝ իրականացվել են նաև մի շարք գործողություններ ԱՄՆ-ի դաշնակիցների՝ Սիրիայի դեմոկրատական ուժերի (ՍԴՈւ) հետ համատեղ, որոնց արդյունքում ձերբակալվել է ԻՊ 6 գործակալ։
ԱՄՆ-ի պաշտոնատար անձինք խոստովանել են, որ ԱՄՆ-ի կենտրոնական հրամանատարությունը լրացուցիչ մարտարշավներ է իրականացրել Սիրիայում, սակայն հրաժարվել են մանրամասն տեղեկություններ հաղորդել։ Կենտրոնական հրամանատարության խոսնակ, գնդապետ Ջո Բուչինոն, մասնավորապես, ասել է, որ յուրաքանչյուր գործողություն մանրակրկիտ ծրագրվում Է, և հաշվի են առնվում դրա անցկացման հետ կապված վտանգները։ Նա ընդգծել է, որ դա թույլ է տալիս մարտարշավներ իրականացնել՝ «առանց քաղաքացիական բնակչության շրջանում զոհերի կամ ենթակառուցվածքներին վնաս պատճառելու էական ռիսկի»:
Հրատարակությունը մեջբերում է ԱՄՆ-ի կենտրոնական հրամանատարության ղեկավար Էրիկ Կուրիլայի խոսքերը, ով դեկտեմբերի 22-ին հայտարարել էր. «Չնայած ԻՊ-ն զգալիորեն թուլացել է Իրաքում և Սիրիայում, խմբավորումը, սակայն, պահպանում է տարածաշրջանում գործողություններ իրականացնելու ունակությունը։ Մենք նաև գիտենք, որ խմբավորումը ցանկություն ունի հարվածներ հասցնել տարածաշրջանի սահմաններից դուրս»։
Պաշտոնատար անձինք միևնույն ժամանակ նշել են, որ չնայած տարածաշրջանում սպառնալիքի աճին, ԻՊ-ն անմիջական վտանգ չի ներկայացնում ԱՄՆ-ի համար։ Նրանք միևնույն ժամանակ շեշտել են, որ 2014 թ.-ին ԻՊ-ն բավական արագ, ընդամենը շաբաթների ընթացքում լուրջ սպառնալիք ներկայացնող ուժի վերածվեց:
Այժմ Սիրիայի տարբեր հատվածներում ամերիկացի զինվորականների թվաքանակը կազմում է մոտավորապես հազար մարդ։ Թուրքիայի ռազմաօդային ուժերն այս տարվա նոյեմբերին հարվածներ են հասցրել Սիրիայի և Իրաքի հյուսիսում ՍԴՈւ-ի դիրքերին։ ՍԴՈւ-ի կորիզը քրդական զինված կազմավորումներն են, որոնք Թուրքիան համարում է ահաբեկչական։ Այս առնչությամբ ԱՄՆ պաշտպանության նախարարության ներկայացուցիչ գեներալ Փեթ Ռայդերը հայտարարել է, որ Թուրքիայի հարվածներն սպառնում են հարձակումների ենթարկված շրջաններում տեղակայված ամերիկացի զինվորականների անվտանգությանը, և կոչ է արել անհապաղ թուլացնել լարվածությունը։
