ԱՄՆ Պետքարտուղարության ներկայացուցիչ Վեդանտ Պատելը հայտարարել է, որ ԱՄՆ Չինաստանին համարում է իր միակ մրցակիցը, որը ոչ միայն մտադիր է փոխել գոյություն ունեցող աշխարհակարգը, այլ նաև զարգացնում է տնտեսական, դիվանագիտական, ռազմական և տեխնոլոգիական ուժ այս նպատակին հասնելու համար, ասվում է Պետդեպարտամենտի խոսնակ Վեդանտ Պատելի հայտարարության մեջ։ «Չինաստանը մեր միակ մրցակիցն է, որը և՛ վճռական է փոխելու միջազգային կարգը, և՛ դառնում է ավելի մեծ տնտեսական, դիվանագիտական, ռազմական և տեխնոլոգիական ուժ՝ այդ նպատակին հասնելու համար», հայտարարել է Պատելը:
Գործնականում, տարեվերջյան այդ հայտարարությունն արտահայտում է 2022 թվականի դրամատիկ աշխարհաքաղաքական ընթացքը, սկսած Ուկրաինայում պատերազմով, մինչև այլ ռեգիոններում բավականին թեժ իրավիճակը, որոնց շարքում է նաև Կովկասը: Որքան էլ հնչի տարօրինակ, բայց Կովկասի դիմակայությունն էլ իր էքզիստենցիալ խորքում այսօր պարունակում է առավելապես այդ իմաստը՝ ձևավորել չինական հավակնությունները զսպող միջավայր, որտեղ է նաև թե Իրանի, թե Ռուսաստանի, թե Թուրքիայի դերակատարման դիտարկումների առանցքային շրջանակը:
Իրանը 2021 թվականին կնքեց Չինաստանի հետ 25-ամյա գործակցության ծրագիր, մոտ 500 միլիարդ դոլարի ներդրումային հեռանկարներով: Միաժամանակ, 2022 թվականի ընթացքում խորացել է ռուս-իրանական գործակցությունը: ԱՄՆ հայտարարում է, որ ամեն ինչ անելու են ռուս-իրանական դաշինքը կազմալուծելու համար: Միևնույն ժամանակ, դրա առանցքային գործիքներ դիտվելու են Թուրքիան, Իսրայելը, և այդ համատեքստում նաև Ադրբեջանը: Ավելին, այդ իմաստով իհարկե Չինաստանի զսպման գործիք դիտարկվելու է թերևս նաև կենտրոնասիական ռեգիոնում թյուրքական տարրի ուժեղացումը և Չինաստանին սպառնալիք դիտող ԱՄՆ թերևս կօժանդակի այդ հավակնությանը:
Ըստ այդմ, Կովկասը կարող է դիտվել ոչ միայն առանձին նպատակների միավոր, այլ նաև Թուրքիայի ավելի կայուն ու հուսալի ճանապարհ դեպի կենտրոնասիական ռեգիոն: Այդ ճանապարհն արգելակելու համար է նաև, որ Ռուսաստանը հավակնում է ներկայության Սյունիքում: 2023 թվականն այդ առումով շարունակելու է լինել բավականին բարդ տարի, Հայաստանի առաջ բերելով նոր խնդիրներ ու մարտահրավերներ: Դրանք պետք է լինեն ոչ թե խուճապի կամ անելանելիության, այլ հանդարտ խորհումի և աշխատանքի շարժառիթ: Այսօր աշխարհում գործնականում չկա միջավայր, որտեղ լեցուն չեն տարաբնույթ մարտահրավերները: Ըստ էության, կան դրանց պատրաստ և անպատրաստ հանրություններ ու պետությունները: Հայաստանը պետք է աննի առավելագույնը առաջինների դասում լինելու համար:
