ԱՄՆ նախագահ Ջո Բայդենը դեկտեմբերի 29-ին հաստատել է երկրի 2023 ֆինանսական տարվա (սկսվել է հոկտեմբերի 1-ին) բյուջեն՝ մոտ 1,7 տրիլիոն դոլարի չափով: Այս մասին նշված է Սպիտակ տան մամուլի ծառայության տարածած հայտարարության մեջ։
«Հինգշաբթի օրը՝ 2022 թ. դեկտեմբերի 29-ին, նախագահն ստորագրել է H. R. 2617 «2023 թ.-ի համախմբված հատկացումների մասին ակտը», որը նախատեսում է համախմբված հատկացումներ 2023 թվականի սեպտեմբերի 30-ին ավարտվող ֆինանսական տարվա համար, ինչպես նաև արտակարգ օգնություն Ուկրաինայում տիրող իրադրության և այլ նպատակների համար»,- նշված է փաստաթղթում։
CBS News-ը նշում է, որ օրինագիծը կնպաստի քաղցկեղի և այլ հիվանդությունների վերաբերյալ առաջադեմ հետազոտություններին, համայնքներն ավելի ապահով կդարձնի, առաջնահերթություն կտա հոգեկան առողջությանը, կբարելավի բարձրորակ առողջապահական խնամքի հասանելիությունը Հնդկաստանի համար և կուժեղացնի աշխատող հղի կանանց իրավունքների պաշտպանությունը:
Օրինագիծը նաև տրամադրում է ռեսուրսներ Ուկրաինային անհրաժեշտ աջակցությունը ցուցաբերելու համար, ապահովում է պատմության մեջ ամենամեծ ֆինանսավորումը Կանանց նկատմամբ բռնության մասին օրենքի համար և բարեփոխումներ է նախատեսում ընտրողների քվեների հաշվարկի մասին օրենքում: Անցյալ շաբաթ օրինագիծը հաստատել էր ԱՄՆ Կոնգրեսի Սենատը և Ներկայացուցիչների պալատը: Միջոցների մեծ մասը՝ մոտ 858 մլրդ դոլար, կուղղվի պաշտպանությանը, իսկ պաշտպանության հետ չկապված ծախսերին հատկացվեու Է 722,5 մլրդ դոլար: Նախորդ ֆինանսական տարում պաշտպանության համար ԱՄՆ բյուջեն մոտ 10%-ով պակաս էր (մոտ 782 մլրդ դոլար): Բյուջեով նաև նախատեսվում է Ուկրաինային տրամադրել 44,9 միլիարդ դոլարի աջակցություն, որի մի մասը կուղղվի ուկրաինացի զինվորականների վերապատրաստմանը և Կիևին ուղարկված զենքի պաշարների համալրմանը։ Նախորդ ֆինանսական տարվա բյուջեում Ուկրաինային տրամադրվել է 13,6 միլիարդ դոլարի ընդհանուր աջակցություն։ Մոտ 40 միլիարդ դոլար էլ կհատկացվի բնական աղետներից տուժած համայնքներին, որոնք վերականգնվում են փոթորիկներից, անտառային հրդեհներից, երաշտից և այլ բնական աղետներից:
