Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում(դատավոր Ա.Մկրտչյանի նախագահությամբ) քննվում է թիվ ԵԱՔԴ/0104/01/10 քրեական գործը` ըստ մեղադրանքի Արմեն Մարտիրոսյանի և մյուսների ՀՀ քրեական օրենսգրքի 175 հոդվածի 3 մասի 1-ին և 2-րդ կետերով, 235 հոդվածի 3-րդ մասով և 236 հոդվածի 3-րդ մասով:
Հելսինկյան ասոցիացիան նշված քրեական գործով մոնիտորինգ իրականացնելու ընթացքում գրանցել է մի շարք խախտումներ, մասնավորապես`
● Արմեն Մարտիրոսյանին հանցագործություն կատարելու կասկածանքով ձերբակալել են Գյումրիում և բերման ենթարկել Երևանի Արաբկիր համայնքի ոստիկանական բաժանմունք, ճանապարհին և բաժանմունքում նրան ենթարկել են ծեծի և խոշտանգումների, դրանից 2-3 օր հետո վերջինիս տեղափոխել են մանկական գաղութ, որտեղ նաև մայրն է տեսել իր որդու մարմնի վրա խոշտանգման հետքերը:
● Ձերբակալման պահին Ա.Մարտիրոսյանը եղել է անչափահաս, սակայն հարցաքննություններին և այլ քննչական գործողություններին ներկա չի գտնվել վերջինիս օրինական ներկայացուցիչը:
● Խոշտանգումների միջոցով ոստիկանության աշխատակիցները ցանկացել են կորզել իրականությանը չհամապատասխանող ինքնախոստովանական և գործով անցնող այլ մեղադրյալների դեմ զրպարտչական ցուցմունքներ` ավազակային հարցակում կատարելու մի քանի դրվագներով, որոնց մասնակից Ա.Մարտիրոսյանը չի եղել, խոշտանգումներից փրկվելու համար Արմեն Մարտիրոսյանը գաղութում ինքնասպանության փորձ է կատարել կտրելով երակները: Այնուամենայնիվ քրեական գործը անհիմն մեղադրանքով ուղարկվել է դատարան:
Դատաքննության ընթացքում Ա.Մարտիրոսյանը երկու անգամ ևս ինքնասպանության փորձ է կատարել, վերջինը տեղի է ունեցել 29.08.2011 թ-ին:
Հելսինկյան ասոցիացիան իր գործունեության ընթացքում բացահայտել է խոշտանգումների միջոցով ցուցմունքներ կորզելու բազմաթիվ դեպքեր, որոնց կամ համապատասխան ընթացք չի տրվել, կամ անազատության մեջ գտնվող անձի մարմնական վնասվածքների առաջացման պատճառը նշվել է բերման ենթարկվելուց մեկ օր առաջ տան մոտ, կամ ՁՊՎ-ի քնելատեղից վայր ընկնելու հետևանք, ինչպես նաև բազմաթիվ են այն քրեական գործերը, որոնցով մեկ դրվագով հանցագործություն կատարած անձանց մեղսագրվում են չբացահայտված այլ հանցագործություններ, այդպիսով ՀՀ Ոստիկանության և ՀՀ Դատախազության վարկանիշը բարձրացնելու և բացահայտված դեպքերի ցուցանիշները ավելացնելու համար:
Բաց նամակով ենք դիմում Ձեզ վստահ լինելու համար, որ այս ճանապարհով Դուք կծանոթանաք բողոքին և միջոցներ կձեռնարկեք բողոքում նշված անօրինականությունները վերացնելու ուղղությամբ, քանզի փոստով Ձեզ հասցեագրված որևէ գրության պատասխան չենք ստացել, որը առիթ է տալիս մտածելու, որ ՀՀ Արդարադատության նախարարը չի ստանում իրեն հասցեագրված գրությունները(թեև բոլոր գրությունները ուղարկվել են պատվիրված նամակով):
ՆԱԽԱԳԱՀ`
Մ.ԴԱՆԻԵԼՅԱՆ
