Ադրբեջանի արտգործնախարար Ջեյհուն Բայրամովը օրերս հայտարարել էր, որ Հայաստանը պետք է դուրս գա ադրբեջանական ութ գյուղերից՝ անկլավներից։ Նա նշել է, որ սահմանազատման գործընթացը, որքան էլ որ բարդ լինի, պետք է տեղի ունենա բանակցությունների միջոցով՝ բոլոր փաստաթղթերի իրավաբանական ուսումնասիրությանը զուգընթաց: Անհրաժեշտ է առաջ շարժվել քայլ առ քայլ: Այս համատեքստում առկա է ութ գյուղերի հարցը, որտեղ հարյուրամյակներ շարունակ ապրել են ադրբեջանցիներ: Ուստի այդ գյուղերը պետք է վերադարձվեն Ադրբեջանին: Նա նաև կոչ է արել Հայաստանին դադարեցնել «սադրանքները սահմանին»: «Հայաստանը պետք է վերջ տա ցանկացած տեսակի սադրանքներին, որոնք դանդաղեցնում են սահմանազատման գործընթացը։
Այս առնչությամբ, քարտեզագետ Ռուբեն Գալիչյանը «Առաջին լրատվական»-ի հետ զրույցում նկատեց, որ ըստ Ադրբեջանի Սահմանադրության՝ Ադրբեջանը ժառանգն են Ադրբեջանի առաջին հանրապետության տարածքի, որտեղ անկլավներ չկան, հետևաբար, նրանք իրավունք չունեն անկլավներ պահանջելու. «Իսկ եթե ընդունեն սովետական քարտեզները, փաստաթուղթ չունեն, չկա փաստ, թե ով է տվել իրենց այդ անկլավները, որոնք գոյացել են 1936 թվականից հետո։ Այսինքն մենք փոխադարձ պահանջ պետք է ներկայացնենք, որ ամբողջական տարածքները Կարմիր Քրդստանի պատրվակով վերցվեցին Հայաստանից, խոսքը մի քանի հարյուր քառակուսի կմ-ի մասին է»:
Անդրադառնալով Բայրամովի հայտարարությանը, թե այդ 8 գյուղերում հարյուրամյակներով ադրբեջանցիներ են ապրել, Գալիչյանն ասաց. «Արցախն էլ հարյուրավոր, անգամ հազարավոր տարիներ ապրել են հայեր, պետք է Արցախն էլ տաք հայերին»:
Նա համոզված է, որ սահմանազատումը այն ժամանակ կարելի է սկսել, երբ Ադրբեջանը դուրս գա Հայաստանի տարածքներից, որտեղ ներխուժել է անցյալ տարվա մայիսից. «Սահմանազատում հնարավոր չէ, քանի դեռ Ադրբեջանը դուրս չի եկել Հայաստանի տարածքներից: Իրեն ինչ տալիս ես, ինքը ավել է ուզում, ինչքան զիջես, այնքան երես կառնի, ավել կուզի։ Րոպե առաջ պետք է կանգնեցնել Ադրբեջանին: Եթե նա ասում է՝ անկլավ ունի ՀՀ տարածքում, նա պետք է փաստաթուղթ ներկայացնի, որ իրենն է , բայց չկա նման փաստաթուղթ։ Եթե ունենային, մինչև հիմա ցույց կտային: Այն, ինչ կատարվել է անկլավների մասով, Մոսկվայի որոշումն է եղել, քարտեզի վրա գծել է: 1936 թվականի և 1939 թվականի սովետական քարտեզներում առկա են անկլավները, բայց նրանք չեն ընդունում սովետական քարտեզները, ավելին, այդ անկլավները ապօրինի են տրվել Ադրբեջանին»,-ընդգծեց քարտեզագետը: