ՌԴ ԱԳՆ խոսնակ Զախարովան հայտարարել է, որ Երևանից ակնկալում են փաստեր, թե ով է Հայաստանին Միութենական պետություն կամ «միջանցք» պարտադրում, ինչպես է դա տեղի ունեցել, ո՞ր ռուսաստանցի պաշտոնյան է ներկայացրել այդ հարկադրանքը, ինչ պայմաններում և այլն: Թեման ինչպես հայտնի է «բացվեց» Հայաստանի ԱԽ քարտուղարի հեռուստատեսային հայտարարություններից, որոնք հնչում էին այն օրը, երբ Հայաստանի վարչապետ Նիկոլ Փաշինյանն էլ Սանկտ-Պետերբոուրգում բանակցել էր Պուտինի հետ: Ունի՞ Երևանը փաստեր, որոնք կներկայացնի, թե՞ փաստեր կան, բայց չկա դրանք ներկայացնելու նպատակահարմարություն: Սա կարևոր հարց է, բայց ոչ այն պատճառով, որ ակնկալում է Զախարովան, և անգամ ոչ այն պատճառով, որ Զախարովայի շուրթերով ակնկալում է Ռուսաստանը:
Հարցը կարևոր է հասկանալու համար, թե ընդհանրապես ինչ է տեղի ունենում և ինչ հաշվարկի վրա են հիմնված հնչող հայտարարությունները, ու ընդհանրապես դրանք ունե՞ն հաշվարկ, այդ հաշվարկը Հայաստանի՞նն է, թե՞ ոչ: Այս օրերին Հայաստանում շատ է հնչում հարցը, թե՝ եթե չկա պարտադրանք, ապա հայաստանցի պաշտոնյան ստու՞մ է, թե՞ ստում են ռուս պաշտոնյաները, ասելով, որ չկա պարտադրանք: Սակայն, խնդիրը իհարկե ստի և ճշմարտության պրիզմայով հնարավոր է դիտարկել քաղաքացիական դիրքից, սակայն քաղաքական դիրքում չափումները ունեն իհարկե այլ մեկնակետեր:
Ի վերջո՝ «քաղաքականություն է սըր», եթե արտահայտվենք հայտնի անեկդոտով: Քաղաքականությունն իսկապես էլ, առավել ևս համաշխարհային պատերազմի պայմաններում, պարզ բան չէ: Ըստ այդմ խնդիրը այն չէ, ասվածի հարցում ով է ստում, ով՝ ոչ, ով է մասամբ հայտնում ճշմարտությունը, ով՝ ոչ: Ի վերջո, Մոսկվան կարող էր իր «պահանջները» ներկայացնել ոչ պաշտոնական խողովակներով: Սակայն, այդ պարագայում էլ հարց է առաջանում, թե կարո՞ղ էին ոչ պաշտոնական խողովակները մանիպուլացնել, տարբեր նկատառումներով: Եվ արդյո՞ք Երևանը տրվել է այդ խայծին: Իսկ փորձե՞լ է ոչ պաշտոնական խողովակներից ստացվողը հստակեցնել պաշտոնական մակարդակում: Հարցերը իսկապես շատ են, ու, կրկնեմ՝ գլխավորն այստեղ հասկանալն է, թե ինչ տրամաբանություն ու հաշվարկ կա այդօրինակ հայատարարությունների ներքո և որքան է դրանց էֆեկտիվությունը, ու՞մ ձեռքն են դրանք ավելի շատ փաստարկ ու խաղաքարտ դնում, և ինչ մասով:
