Ռուսաստանի Անվտանգության խորհրդի փոխնախագահ, նախկին նախագահ Դմիտրի Մեդվեդևը տելեգրամյան իր ալիքում սպառնացել է այն ռուսաստանցիներին, որոնք իրենց երկրին պարտություն են ցանկանում, պետք է զրկվեն մինչև կյանքի վերջը Ռուսաստան վերադառնալու իրավունքից, ինչպես նաև հայրենիքում առկա բոլոր եկամտի աղբյուրներից։ Նրա խոսքով՝ անբարո այս իրավիճակին, երբ դավաճանները տենչում են սեփական պետության պարտությունը, բայց դրան զուգահեռ նաև գումար են վաստակում Ռուսաստանի հաշվին, պետք է մեկընդմիշտ վերջ տալ։ Սա, ըստ ամենայնի, կարող է վերաբերել նաև ՌԴ-ի ազգությամբ հայ քաղաքացիներին, որոնցից շատերը հեռացել են Հայաստանից:
Այս առնչությամբ, «Հայկական կարիտաս» ՀԿ միգրացիոն ծրագրի փորձագետ Տաթևիկ Բեժանյանը «Առաջին լրատվական»-ի հետ զրույցում նկատեց. «Մեդվեդևը հայտարարել է ոչ թե օտարերկրյա քաղաքացիների, այլ այլ ՌԴ քաղաքացիների մասին: Իսկ եթե խոսքը ազգությամբ հայ ՌԴ քաղաքացիների մասին է, ապա նա տարբերություն չի դրել ազգությունների մեջ: Կապ չունի՝ նրանք ռուս են, տաջիկ են, ղրղզ են, թե հայ:
Ես, անկեղծ ասած, չեմ զարմանում Ռուսաստանի պաշտոնյաների նման վերաբերմունքից, որովհետև իրենք ուզում են, որ իրենց քաղաքացիները գնան և բոլորը կամավոր զոհվեն հանուն երկրի ղեկավարի, «за родину, за Путина»: Բայց աշխարհը շատ է փոխվել, ինֆորմացիոն աղբյուրները բազմազան են, մի տեղից չեն: Ի վերջո, մարդիկ չեն ուզում չգիտես ինչի համար զոհվեն, և ինչու զոհվեն, երբ իրենք ուկրաինացիներին չեն համարում թշնամի, համարում են իրենց արյունակից եղբայրներ: Ոչ բոլորն են կիսում երկրի ղեկավարի կարծիքը: Ես կարծում եմ՝ սա ինչ-որ հուսահատական հայտարարություններ են: Չեմ կարծում, որ Մեդվեդևը այն պաշտոնյան է, որ մի բան կհայտարարի և հաջորդ օրը դա կարվի: Կարծում եմ՝ սա տրամադրությունները շոշափելու, հասկանալու քայլ է»:
Բեժանյանը հավելեց, որ չի կարծում, որ եթե Մեդվեդևն այդպիսի բան է հայտարարել, հենց այդպես էլ կլինի. «Կարծում եմ, որ այդ միջոցով ուղղակի տրամադրություններ են շոշափում: ՌԴ ղեկավարությունը հիմա այնքան էլ հաճելի վիճակում չի գտնվում, ամբողջ աշխարհի կողմից մեկուսացված է, Պուտինը աշխարհի կողմից չարիք է համարվում, որի դեմ պետք է միջոցներ կիրառել: Ռուսաստանի ՆԳ նախարարն էլ հայտարարեց, թե պետք է խստացնել միգրանտների նկատմամբ ոստիկանության քայլերը, որովհետև նրանց շրջանում աճել է հանցագործությունների տոկոսը: Հիմա եթե իրենց քաղաքացիներին չկարողանան շահագրգռել, ներքին նոր թշնամի կգտնեն, իսկ իրենց համար դա միշտ եղել են միգրանտները: Նրանք ինչ-որ պայքար կսկսեն, իրենց քաղաքացիների ականջին հաճելի ինչ-որ բաներ կասեն, որպեսզի արդյունքում կարողանան համոզել սկսածը շարունակելու համար: Որովհետև երկրի բնակչության գիտակից հատվածը դեմ է այդ պատերազմին, չեն ուզում գնալ ու կռվել»,-ընդգծեց Բեժանյանը:
Նա նկատեց, որ եթե իսկապես Մեդվեդևի հայտարարածը կյանքի կոչեն և սկսեն կիրառել, դա բոլորի վրա կանդրադառնա, այ թվում ազգությամբ հայերի, որոնք ունեն ՌԴ քաղաքացիություն. «Բայց դա առաջին հերթին բացասական ազդեցություն կունենա հենց Ռուսաստանի վրա, որովհետև նման հայտարարությունից հետո չի բացառվում, որ մինչև իրենք պրոցեսը սկսեն, այն մարդիկ, որոնք այնտեղ ունեն որոշակի եկամտի աղբյուրներ, գուցե սկսեն վաճառել ու ընդհանրապես կապը կտրեն այդ երկրի հետ: Դա շատ երկսայր թուր է: Այդ մարդիկ կարող են իրենց տնտեսական գործունեությունը, որ ծավալում էին ՌԴ-ում, վաճառեն ու կապերը կտրեն ՌԴ-ի հետ: Դա Ռուսաստանի համար էլ շատ վնաս կլինի:
Եթե դու հայտարարում ես, որ արտերկրում գտնվողն ՌԴ քաղաքացիները, որոնք չեն պատրաստվում վերադառնալ, նրանց եկամտի աղբյուրների վրա պետք է կալանք դնել, այդ մարդիկ պարզապես իրենց կապիտալը կհանեն ՌԴ-ից: Եվ կարող է շատ մեծ գումարների մասին լինել խոսքը:
Օրինակ, շոու բիզնեսի ներկայացուցիչները, որոնք արտերկրում են և ակնհայտ հակապուտինյան քարոզ են տանում, բավականին լուրջ կապիտալ ունեն: Եթե նրանք որոշեն հանել իրենց կապիտալը ՌԴ-ից, Ռուսաստանի համար երևացող վնաս կլինի: Նրանց թիվը քիչ չէ: Ես չգիտեմ՝ որքանով խելամիտ քայլ կլինի իշխանության կողմից նման քայլ անելը»,-հայտարարեց Բեժանյանը:
