ԻԻՀ բանակի համակարգման փոխհրամանատար Հաբիբոլլա Սայարին հայտարարել է, որ իրանական բանակը հինգշաբթի գիշերը կսկսի «Զոլֆագար-1401» համատեղ զորավարժությունները։ Այս մասին տեղեկացնում է IRNA գործակալությունը։
«Զորավարժությունները կկազմակերպվեն Ջասքում և Հորմուզի նեղուցից արևելք՝ Իրանի հարավում և կերկարաձգվեն մինչև Հնդկական օվկիանոսից 10 աստիճան հյուսիս»,- ասել է հրամանատարը մամուլի ասուլիսում։
Ցամաքային, օդային և ռազմածովային ուժերը կմասնակցեն համատեղ զորավարժություններին։ Զորավարժությունների գլխավոր խնդիրներից մեկը հրամանատարն անվանել է զորքերի խորացված պատրաստությունը հատուկ պայմաններում գործողություններ իրականացնելու համար։
Նա ընդգծել է, որ զորավարժությունները նպատակ ունեն հիշեցնել տարածաշրջանի երկրներին, որ խաղաղություն ձեռք կբերվի միայն տարածաշրջանային ներուժի ու միասնության շնորհիվ։
«Պատմությունն ապացուցել է, որ անդրտարածաշրջանային դերակատարները ձգտում են պատերազմի և անկայունության»,- ընդգծել է նա։
Հրամանատարը նաև ընդգծել է, որ ոչ տարածաշրջանային երկրների, այդ թվում՝ ԱՄՆ-ի և Մեծ Բրիտանիայի դուրս գալը տարածաշրջանից կայունություն կապահովի։
«Զոլֆագար-1401»-ը նախատեսված է ցույց տալու Իրանի Իսլամական Հանրապետության դեմ զենքի էմբարգոյի անարդյունավետությունը, հայտնում է աղբյուրը։