Պետական եկամուտների կոմիտեում քննված քրեական վարույթներով 2022-ի ընթացքում պետական բյուջե է վերականգնվել ավելի քան 23 մլրդ դրամ: 2021-ի ընթացքում վերականգնվել է շուրջ 5 մլրդ դրամ, 2020-ին՝ շուրջ 2,5 մլրդ դրամ, 2019-ին՝ շուրջ 5,8 մլրդ դրամ, 2018-ի ընթացքում՝ շուրջ 8,5 մլրդ դրամ, իսկ 2017-ին վերականգնվել է մոտ 8,5 մլրդ դրամ պետությանը պատճառված վնաս: ՊԵԿ քննչական վարչությունում քննված քրեական վարույթները վերաբերել են հարկ վճարողների կողմից ՀՀ տարածքում իրականացրած տնտեսական գործունեության տարբեր ճյուղերին՝ ներմուծում-արտահանում, հանքարդյունահանում, ծառայությունների մատուցում, առևտուր, գույքի օտարում, մաքսանենգության դեպքեր և այլն:
«Քննվել են նաև փողերի լվացման, խարդախության հանցակազմերով քրեական վարույթներ, որոնց քննության արդյունքներով հարուցված հանրային քրեական հետապնդումների հիման վրա մեղադրանքներ են ներկայացվել տարբեր անձանց, 35 քրեական վարույթով նախաքննությունն ավարտվել է և քրեական վարույթները մեղադրական եզրակացությամբ հանձնվել են հսկող դատախազներին՝ վարույթները դատարան ուղարկելու համար։ Այս առնչությամբ, «Արդար Հայաստան» կուսակցության նախագահ, փաստաբան Նորայր Նորիկյանը «Առաջին լրատվական»-ի հետ զրույցում նշեց, որ այդ հայտարարությունն այն մասին էր, որ հարկեր վճարելուց խուսափելու դեպքեր են եղել, քրեական վարույթներ են նախաձեռնվել, որոնց արդյունքում վերականգնվել է պետությանը պատճառված վնասը:
Երբ նայում ենք տարիների վիճակագրությանը, բնականաբար, այս տարվա թվերը խոսուն թվեր են, բայց այդ թվերը հնարավոր կլիներ ամբողջական գնահատել, եթե մենք կարողնայինք ամբողջական տեղեկատվությունն ունենալ հետևյալ հարցերի կապակցությամբ. Ընդհանրապես, ենթադրաբար ինչքան վնաս է հասցվել պետությանը, այդ վնասից որքանն է վերականգնվել, և ամենակարևոր խնդիրը՝ ո՞ր տարիներին է վերաբերում այս թիվը: 2022-ին է պետությանը պատճառվել 23 մլրդ դրամի վնաս, որը վերականգնվել է, թե՞ սա նախորդ տարիների պաատճառված վնասի վերականգնում է: Որովհետև երբ նայում ենք թվերին, 2020-ին ընդամենը 2,5 մլրդ դրամ է վերականգնվել, անցած տարի՝ 5 մլրդ: Այսինքն՝ այսպիսի տատանումները խոսում են նրա մասին, որ մեկ տարվա մեջ չէր կարող այսպիսի ճեղքում լինել: Սա, ըստ էության, պայմանավորված է նախորդ տարիների թույլ տված ապօրինությունների վերականգնմամբ, որի արդյունքում այսպիսի տպավորիչ թիվ է ստացվում:
Կարո՞ղ ենք ասել, որ իշխանություններին չի հաջողվում համակարգային պայքար ծավալել կոռուպցիայի դեմ, Նորիկյանը պատասխանեց. «Նախորդ տարիների ընթացքում համակարգային փոփոխություններ ես չեմ տեսել, և որևէ մեկը, այդ թվում իշխանությունը չի կարող հակառակը պնդել կամ մատնացույց անել մի ոլորտ, որտեղ իրականացվել է համակարգային փոփոխությունը, և դա տվել է շոշափելի արդյունքներ: Այո, իրավիճակային, կոնյուկտուրային ինչ-որ հրդեհը հանգցնելուն միտված քայլեր են եղել, որոնք ռազմավարական առումով չեն կարող բերել լրջագույն փոփոխությունների: Կադրային փոփոխությունների կարելի համարել ռազմավարական կամ համակարգային փոփոխություններ: Պետք է հասկանալ՝ հարկային վարչարարության մակարդակը որքանով է փոխվել, հարկատու-իրավասու մարմին հարաբերություններում արդյոք բյուրոկրատիան նվազել է, արդյոք կոռուպցիան ամբողջությամբ վերացել է, արդյոք մենաշնորհները վերացել են, արդյոք ներմուշման և արտահանման գործընթացներում բոլոր քաշքշուկները վերացել են, արդյոք «դաբրո»-ները վերացել են: Սրա մասին է խոսքը, և գնահատականը հանրությունն ինքը պետք է տա»:
