Մոնղոլիայի նախագահ Ուխնաագիյն Խուրելսուխը հրամանագիր է ստորագրել, որով կառավարությանը հանձնարարել է վերականգնել երբեմնի մայրաքաղաք Կարակորումը: Այդ մասին տեղեկանում ենք «РИА Новости» գործակալությունից:
Կարակորումը Մոնղոլական կայսրության մայրաքաղաքն է եղել 1235-1260 թվականներին կայսրության ծաղկման դարաշրջանում, երբ դրա մեջ մտնում Էին Ճապոնական ծովից մինչև Արևելյան Եվրոպա ընկած տարածքներ:
Ներկայումս քաղաքի տեղում գտնվում է Կարակորումի պատմության թանգարանը, որը բացվել է 2011 թվականին։ Քաղաքը շրջապատող Օրխոն գետի հովտի մշակութային լանդշաֆտը ՅՈՒՆԵՍԿՕ-ի համաշխարհային ժառանգության մշակութային օբյեկտ է: Վերջին տասնամյակների ընթացքում նույնիսկ առաջարկներ են եղել Մոնղոլիայի մայրաքաղաքը Ուլան Բատորից Կարակորում տեղափոխելու մասին։
«Հրամանագրի նպատակն է քաղաքացիների համար ստեղծել առողջ և անվտանգ միջավայրում ապրելու պայմաններ, ընդլայնել հիմնական սոցիալական ծառայությունների հասանելիությունը, ապակենտրոնացնել բնակչությանը, ապահովել շրջանների համաչափ զարգացումը, ամրապնդել պետության արժեքավոր ժառանգությունը, վերականգնել դրա պատմությունն ու մշակույթը», – նշվում է Մոնղոլիայի նախագահի գրասենյակի տարածած հաղորդագրությունում։
Համաձայն հրամանագրի՝ կառավարությունը պետք է ուսումնասիրի Օրխոնի հովտի պատմական հուշարձանի տարածքում Խարա-Խորին քաղաքի կառուցման հարցը, նախագիծ պատրաստի և այն ներկայացնի խորհրդարանին, մշակի քաղաքի զարգացման գլխավոր պլան և իրավական բազա: Հրամանագրում չի նշվում վերականգնումից հետո մայրաքաղաքը Կարակորում տեղափոխելու հնարավորության մասին։
