Սանկտ Պետերբուրգում մեկնարկել է Հայաստանի վարչապետ Նիկոլ Փաշինյանի հանդիպումը Ռուսաստանի նախագահ Վլադիմիր Պուտինի հետ: Վարչապետը Սանկտ Պետերբուրգ էր ժամանել երեկ, մասնակցել էր ԱՊՀ անդամ երկրների ղեկավարների ոչ պաշտոնական հանդիպմանը: Հանդիպման սկզբում Վլադիմիր Պուտինը նշել է, թե տնտեսության ոլորտում իրավիճակի շատ դրական զարգացում ունեն. Այս տարվա 10 ամիսներին առևտրաշրջանառությունն ավելացել է 73 տոկոսով:
Ռուսաստանի նախագահը նաեւ տեղեկացրել է, որ երեկ՝ ԱՊՀ երկրների ղեկավարների ոչ պաշտոնական գագաթնաժողովին եռակողմ զրույց է կայացել՝ Հայաստանի, ռուսաստանի եւ Ադրբեջանի ղեկավարների մասնակցությամբ։ -Իհարկե, գլխավոր հարցը Հարավային Կովկասում իրավիճակի կարգավորումն է՝ հայ-ադրբեջանական հարաբերությունները, ամեն ինչ, ինչը կապված է Ղարաբաղի հետ: Այնպես որ, ինչպես պայմանավորվել էինք, բոլոր այս հարցերը մանրամասն կքննարկենք»,- ասել է Պուտինը: Նիկոլ Փաշինյանն ընդգծել է, թե այս պահին գլխավոր հարցը, ամենահրատապ խնդիրը Լաչինի միջանցքի ճգնաժամն է։ Ըստ Փաշինյանի, սա ռուս խաղաղապահների պատասխանատվության գոտին է Լեռնային Ղարաբաղում։ -Եռակողմ հայտարարության համաձայն՝ Լաչինի միջանցքը պետք է գտնվի ռուս խաղաղապահների հսկողության ներքո, իսկ Ադրբեջանը երաշխավորում է ուղևորների, բեռների, մարդկանց անխոչընդոտ անցումը»,- ասել է Փաշինյանը եւ հավելել, թե հիմա ստացվում է, որ Լաչինի միջանցքը ռուս խաղաղապահների վերահսկողության տակ չէ։ Մինչ առանձնազրույցը, Միխայիլյան պալատում տեղի է ունեցել ԱՊՀ երկրների ղեկավարների աշխատանքային նախաճաշը, որից հետո նրանք շրջել են Ռուսական թանգարանի ցուցասրահներով, ծանոթացել ներկայացված նմուշներին: Թեմայի շուրջ «Առաջին լրատվական»-ը զրուցել է Մոսկվայի քաղաքական և ռազմական վերլուծությունների կենտրոնի փոխտնօրեն, ռազմական փորձագետ Ալեքսանդր Խրամչիխինի հետ:
