Ուզբեկստանի առողջապահության նախարարությունը հայտնել է, որ սուր շնչառական վիրուսային վարակի դեմ Հնդկաստանի Marion Biotech ընկերության դեղամիջոցը դարձել Է 18 երեխայի մահվան պատճառ, փորձաքննության հաստատված արդյունքներն ուղարկվել են իրավապահ մարմիններին։ Այս մասին տեղեկանում Է ТАСС գործակալությունից:
Ուզբեկստանի առողջապահության նախարարության մամուլի ծառայության տվյալներով՝ մեկ շաբաթ առաջ սկսվել է սուր շնչառական վիրուսային վարակի դեմ հնդկական Marion Biotech ընկերության կողմից արտադրված «Doc-1 Max» օշարակի և հաբերի փորձաքննությունը. ենթադրվում է, որ 18 երեխաները մահացել են դրանց ընդունումից հետո: «Doc-1 Max» օշարակի ընդունման հետևանքով սուր շնչառական հիվանդությամբ 21 երեխաներից 18-ը մահացել Է:
Հավաքված փաստաթղթերը փոխանցվել են իրավապահ մարմիններին», – ասված է հաղորդագրության մեջ։ Ուզբեկստանի առողջապահության նախարարությունում նշել են, որ ներկայումս այդ պատրաստուկի հաբերն ու օշարակները վաճառքից հանվել են հանրապետության բոլոր դեղատներում։ Նախարարության հաղորդագրության մեջ նաև ասված է, որ լաբորատոր հետազոտությունների արդյունքում դեղամիջոցի մեջ հայտնաբերվել է թունավոր նյութ՝ էթիլենգլիկոլ։
«Ուսումնասիրությունը ցույց է տվել, որ մահացած երեխաներին մինչև ստացիոնար բուժման ընդունելը 2-7 օր, օրական 3-4 անգամ տանը տրվել է այս պատրաստուկը՝ 2,5-5 միլիլիտր դեղաչափով, ինչը գերազանցում է դեղամիջոցի՝ երեխաների համար նախատեսված ստանդարտ դեղաչափը», – հավելել են մամուլի ծառայությունում: Ավելի վաղ հաղորդվել Էր, որ Գամբիայում և Ինդոնեզիայում մինչև 5 տարեկան ավելի քան 200 երեխա է մահացել այս դեղամիջոցն ընդունելուց հետո. նշված երկրներում նույնպես դեղամիջոցի մեջ էթիլենգլիկոլ է հայտնաբերվել:
