Դեկտեմբերի 27-ին Սանկտ-Պետերբուրգում տեղի է ունեցել Հայաստանի վարչապետի եւ ՌԴ նախագահի հանդիպումը, որի առանցքային ուշադրության հարցն անշուշտ Արցախում իրադրությունն է, մասնավորապես Լաչինի միջանցքի արգելափակված լինելը: Սկսելով Հայաստանի վարչապետի հետ հանդիպումը, ՌԴ նախագահ Պուտինն արել է որոշակի իմաստով անսպասելի հայտարարություն, նշելով, որ «Նիկոլ Փաշինյանի հետ սկսել են դեռ երեկ, եւ հաջողվել է խոսել երեքով»: Ըստ էության Պուտինը թերեւս նկատի ունի նաեւ Իլհամ Ալիեւին, ինչը նշանակում է, որ տեղի է ունեցել եռակողմ ոչ ֆորմալ զրույց, թեեւ ՌԴ նախագահ Պեսկովը ԱՊՀ Վեհաժողովից առաջ հայտարարել էր, որ եռակողմ հանդիպում նախատեսված չէ:
Իհարկե ավելի վաղ, նույն Պեսկովը հայտարարել էր, որ Մոսկվան պատրաստ է կազմակերպել այդպիսին, եթե կողմերը ունենան ցանկություն: Բայց, Վեհաժողովի նախօրեին նա հայտարարեց, որ հանդիպում նախատեսված չէ, ինչը հիմք է տալիս ենթադրել, որ կողմերը չեն հայտնել ցանկություն: Բայց, փաստորեն, համենայն դեպս դատելով ՌԴ նախագահի խոսքից, եռակողմ խոսակցություն եղել է, եւ եղել է քննարկում, որի հետ կապված մանրամասները Նիկոլ Փաշինյանի հետ քննարկելու մասին էլ բացման խոսքում ասել է Պուտինը: Նա իհարկե ձեռնպահ է մնացել Լեռնային Ղարաբաղ ձեւակերպումից՝ օգտագործելով Ղարաբաղ արտահայտությունը, ինչպես նաեւ չի խոսել Լաչինի միջանցքի մասին:
Փոխարենը, Լեռնային Ղարաբաղի եւ Լաչինի միջանցքի մասին արձանագրել է Հայաստանի վարրչապետը, նշելով, որ նոյեմբերի 9-ի եռակողմ հայտարարության համաձայն, որ ստորագրել են երեք երկրների ղեկավարները, Լաչինի միջանցքը ՌԴ խաղաղապահների պատասխանատվության գոտին է եւ Ադրբեջանը երաշխավորել է անարգել շարժը այնտեղով: «Այժմ ստացվում է, որ Լաչինի միջանցքը ռուս խաղաղապահների վերահսկողության տակ չէ: Իհարկե ցանկալի է քննարկել այդ իրավիճակը, ինչպիսի տարբերակներ կան»: Դատելով Պուտինի եւ Փաշինյանի բացման խոսքերից, նախօրեին տեղի ունեցած եռակողմ խոսակցության ընթացքում քննարկվել են իրավիճակի զարգացման, Լաչինի միջանցքով կապը վերականգնելու որոշակի «տարբերակներ»: Այստեղ հարցական է այն, թե ինչ տրամաբանությամբ է քննարկումը շարունակվել Պուտին-Փաշինյան հանդիպմանը: Եռակողմ ձեւաչափով խոսակցությանը ուրվագծվել են որոշակի սցենարներ, որոնք պետք է հղկվեն Երեւան-Մոսկվա մակարդակում եւ առաջարկի ձեւով փոխանցվեն Բաքվի՞ն, թե՞ Երեւանն ու Մոսկվան քննարկել են դետալներ, եւ այդ քննարկման արդյունքը պետք է լինի պատասխան, որից էլ կախված է լինելու ճանապարհի ապարգելափակումը: