Հայաստանի տնտեսական ակտիվության ցուցանիշը 2022 թվականի հունվար-նոյեմբերին 14.4 տոկոսով ավելացել է նախորդ տարվա նույն ժամանակահատվածի նկատմամբ:
Արտաքին առևտրաշրջանառության ծավալներում 2022-ի հունվար-նոյեմբերին նախորդ տարվա նույն ժամանակի համեմատ արձանագրվել է 67.8 տոկոս աճ, ընդ որում արտահանումն աճել է 75.2 տոկոսով, իսկ ներմուծումը՝ 63.6 տոկոսով: 2022թ. նոյեմբերին տնտեսական ակտիվության ցուցանիշը կազմել է 113.8%, իսկ 2022թ. հունվար֊նոյեմբերին` 114.4%։ Հայաստանի տնտեսական ակտիվության ցուցանիշը նոյեմբերին դանդաղել է։
Վիճակագրության կոմիտեի հրապարակած տնտեսական վերջին տվյալների համաձայն` 2022թ–ի նոյեմբերին տնտեսական ակտիվության ցուցանիշը հոկտեմբերի համեմատ նվազել է 4 տոկոսով։ Մեկամսյա տվյալներով` հիմնականում նվազում է գրանցվել ծառայությունների (4 ամբողջ 2 տոկոսով) և արտաքին ապրանքաշրջանառության ոլորտում (2 տոկոսով)։ Թեմայի շուրջ «Առաջին լրատվական»-ը զրուցել է ՀՀ էկոնոմիկայի նախարարի տեղակալ Արմեն Արզումանյանի հետ:
Փոխնախարարի խոսքով՝ 2022 թվականը տնտեսության համար ակտիվ տարի էր․ «2022-ը ակտիվություն բերեց տնտեսության բոլոր ճյուղերին: Հայաստանը ճիշտ կողմնորոշվեց ու տրանսֆորմացրեց տնտեսությունը: Տարածաշրջանը տնտեսությունը դիվերսիֆիկացնելու խնդիրների առաջ է կանգնած: Մենք ունեցանք ներսհոսք, որը ազդեցություն ունեցավ տնտեսական ցուցանիշների վրա»:
Փոխնախարարը նաև նշեց, որ 2023-ը հեռանկարային է Հայաստանի՝ արտահանման նոր շուկաներ մտնելու համար:
