Կաթողիկոսանիստ Մայրավանքում Ն.Ս.Օ.Տ.Տ. Արամ Ա. Կաթողիկոսի հրավերով, Սոցիալ Դեմոկրատ Հնչակյան Կուսակցության, ՀՅԴ-ի և Ռամկավար Ազատական Կուսակցության վերին մարմինների ներկայացուցիչները՝ Ալեքսան Քէօշկերյանը, Մկրտիչ Մկրտիչյանը և Ավետիս Տագեսյանը դեկտեմբերի 23-ի գիշերը խորհրդակցական հանդիպում են ունեցել: Հանդիպմանը ներկա են եղել նաև Մեծի Տանն Կիլիկիո Կաթողիկոսության Ազգային Կենտրոնական Վարչության համաատենապետները՝ Ստեփան Տեր-Պետրոսյանը և Գրիգոր Մահսերեճյանը:
Վեհափառ Հայրապետը ներկայացրել է ադրբեջանցիների կողմից Արցախը Հայաստանին կապող միջանցքի փակման հարցով միջազգային մամուլին իր կատարած հայտարարությունը և այդ ուղղությամբ հաստատած կապերը՝ միջեկեղեցական ու միջկրոնական շրջանակներում, ինչպես նաև հիշյալ շրջանակների կատարած թե՛ դատապարտումի արտահայտությունները և թե՛ դիվանագիտական աշխատանքները:
Նորին Ս. Օծությունը նաև անդրադարձել է Արցախի նախագահի և պետական նախարարի հետ ունեցած իր հեռաձայնային զրույցին, Կաթողիկոսության թեմերի առաջնորդների կատարած թելադրություններին և այլ աշխատանքների՝ շեշտելով հավաքական ճիգով Սփյուռքում մեր բողոքը արտահայտելու հրամայականը և միջազգային համայնքին պարզելու Բերձորի միջանցքի փակման ստեղծած հատկապես մարդասիրական ծանր հետևանքները և նրա շուտափույթ վերաբացման անհրաժեշտությունը:
Վեհափառ Հայրապետը կոչ է ուղղել համասփյուռքյան մասշտաբով և բոլոր համայնքների, կուսակցությունների, մարմինների և մեր ժողովրդի զավակների մասնակցությամբ, հավաքական կեցվածք ճշտելու, դատապարտումի ձայն բարձրացնելու և միջանցքի շուտափույթ վերաբացումը պահանջելու կարևորությունը: Այս առումով Հայրապետն ընդգծել է երեք կուսակցությունների կարևոր դերը:
Ներկաները ողջունել են Վեհափառ Հայրապետի տարած աշխատանքները ու կիսել նրա մտահոգություններն ու տեսակետները՝ շեշտելով համահայկական ճիգով ու միջկուսակցական գործակցությամբ Սփյուռքի բոլոր գաղութներում կազմակերպվելու և ազդու միջոցներով ու գաղութների շրջապատին համապատասխան մոտեցումով մեր հավաքական բողոքը արտահայտել անհետաձգելի անհրաժեշտությունը», ասվում է հաղորդագրության մեջ:
Այս առնչությամբ, Մեծի Տանն Կիլիկիո Կաթողիկոսության Ազգային Կենտրոնական Վարչության համաատենապետ Ստեփան Տեր-Պետրոսյանը «Առաջին լրատվական»-ի հետ զրույցում նշեց. «Հիմնական հարցը, որ քննարկվեց, միասնականությունն էր Սփյուռքի, Հայաստանի ու Արցախի, որպեսզի մեր բոլոր ուժերով սատարենք Ղարաբաղի իրավիճակի բարելավմանը, անշուշտ, ճանապարհի բացմանը, նաև հասնենք բոլոր համաձայնագրերի իրագործմանը, և ամենակարևորն է, Արցախը Հայաստանին կապող ճանապարհը բաց մնա:
Պետք է կարողանանք արտահայտվել ցույցերով, խաղաղ միջոցներով, տարբեր երկրների դեսպանատների առջև և այլն, որ կարողանանք Սփյուռքի մեր միասնական ձայնը լսելի դարձնել»:
Ստեփան Տեր-Պետրոսյանը չհամաձայնեց դիտարկմանը, թե Սփյուռքի և Հայաստանի միջև խզում կա, նաև Սփյուռքի ներսում տրոհում կա. «Ես կարող եմ ասել, որ Սփյուռքը միասնական է: Նրանք, որոնք ասում են՝ միասնական չէ, ուզում են զբաղվել ուրիշ ազդեցություններով: Կան մարդիկ, որոնք ուզում են, որ այդպես լինի, բայց այդպես չէ: Օրինակ, Լիբանանում մենք արդեն միասնական մի ձեռնարկ ունեցանք, որով բոլոր կուսակցությունները, միությունները միասնական կեցվածքով հանդես եկան այն օրը Վեհափառի հետ հանդիպմանը: Այդ օրվա եզրակացությունը նաև այն էր, որ բոլորս միասնական պետք է աջակցենք Արցախին ու Հայ դատին: Այսինքն Սփյուռքի որևէ հարց, որն ազգային իմաստ ունի մեզ համար, ազգային արժեք է, մենք բոլորս համաձայն ենք: Իսկ բոլոր նրանք, որ ուզում են տարակարծիք լինենք, նրանք հայության շահերի համար չեն աշխատում»:
Հարցին, թե Արամ Ա կաթողիկոսի կոչը որքանով կհամախմբի Սփյուռքին, որքանով համախմբող գործոն կարող է լինել, նա արձագանքեց. «Դա կոչ է համախմբվելու և գործոն լինելու: Կարծեմ որ եկող շաբաթների ընթացքում թե մեր եկեղեցիներում, թե համայնքներում, թե կուսակցությունները նման քայլերի կդիմեն»:
