Փարիզում հարյուրավոր քրդեր ցույցի են դուրս եկել՝ ի հիշատակ դեկտեմբերի 23-ի հրաձգության զոհ դարձած քրդական համայնքի երեք անդամների, ինչպես նաև 2013 թվականի հունվարին սպանված երեք ակտիվիստների: Այս մասին իրադարձությունների վայրից հաղորդում է «РИА Новости» գործակալության թղթակիցը:
Ցուցարարների շարասյունը կեսօրին երթի է դուրս եկել Փարիզի 10-րդ շրջանի Դանգան փողոցից, որտեղ ուրբաթ օրը 69-ամյա տղամարդը կրակ էր բացել քրդական համայնքի երեք ներկայացուցիչների վրա։ Ակցիայի մասնակիցները երթով պետք է քայլեն դեպի Լա Ֆայետ փողոց, որտեղ 2013 թվականի հունվարին սպանվել էին երեք այլ քուրդ ակտիվիստներ։
Կազմակերպիչները ցուցարարներին կոչ են արել կատարել ոստիկանության պահանջները և կարգուկանոն պահպանել: Քրդերը ցույցի էին դուրս եկել նաև շաբաթ օրը: Ցույցը վերածվել էր իրավապահների հետ բախումների, մի քանի ծեծկռտուք էր սկսվել նաև ցուցարարների միջև։ Բողոքի ակցիայի մասնակիցներն արգելափակել էին փողոցները. ամբոխը ցրելու համար ոստիկանությունն արցունքաբեր գազ էր կիրառել։ Ավելի ուշ իրավիճակը սրվել էր, ցուցարարներն սկսել էին կոտրել ավտոբուսների կանգառները, շրջել ավտոմեքենաները, այրել կահույքն ու աղբամանները։
Նրանք նաև դուրս էին հանել ճանապարհի սալաքարերը ոստիկանների վրա նետելու և կանգառներին հարվածելու համար։ Այս ամենի հետևանքով դեկտեմբերի 24-ին Ֆրանսիայի մայրաքաղաքում անկարգությունների ժամանակ բերման էր ենթարկվել 11 մարդ, տուժել էր իրավապահ մարմինների ավելի քան 30 աշխատակից:
Դեկտեմբերի 23-ին 69-ամյա տղամարդը կրակ էր բացել Փարիզի 10-րդ շրջանի քրդական մշակութային կենտրոնից ոչ հեռու։ Հրաձգության հետևանքով զոհվել է երեք քուրդ ակտիվիստ, տուժածներից երկուսը գտնվում են ծայրահեղ ծանր վիճակում, ևս երկուսի վիճակը միջին ծանրության է։ Փարիզի դատախազությունը հետաքննություն Է անցկացնում կանխամտածված սպանության գործով։ Ինչպես հաղորդում է BBC-ն՝ կասկածյալը խոստովանել է, որ ,պաթոլոգիական ատելություն է տածումե ներգաղթյալների նկատմամբ: Նա քննիչներին հայտնել է, որ ուրբաթ օրը հրաձգության ժամանակ ծրագրում էր սպանել ,ոչ եվրոպացի օտարերկրացիներինե:
