«Առաջին լրատվական»-ի զրուցակիցն է Արցախի Հեղափոխական կուսակցության նախագահ Արթուր Օսիպյանը։
-Պարոն Օսիպյան, Ստեփանակերտում տեղի ունեցած կլոր-սեղանի արդյունքում մի շարք մտավորականներ դիմել են ռուս խաղաղապահ զորախմբի հրամանատար Վոլկովին՝ հանդիպման պահանջով։ Որո՞նք են ակնկալիքները՝ նկատի ունենալով, որ շաբաթ օրը, ըստ մամուլում հայտնված տեղեկությունների, խաղաղապահներն ասել էին, որ դեկտեմբերի 26-ին ճանապարհը կբացվի։
–Մի փոքր անհավատալի է, որ այսօր ճանապարհը կբացվի։ Կբացեն, թե ոչ՝ հանդիպման ու հարցերի ակտուալությունը չի կորում։ Եթե կբացվի՝ կհանդիպենք, ըստ արդեն նոր իրադրության, չի բացվի, ըստ այդ իրավիճակի հարցեր կուղղենք։ Իսկ եթե չի հանդիպի՝ մենք կորոշենք մեր անելիքները։ 48 ժամից նոր կլոր-սեղան է լինելու, կորոշենք հետագա քայլերը, թե ինչպես հասնել մեր նպատակին։Վոլկովի հետ հանդիպումն էլ մեր նպատակներից մեկն է։
-Հիմնական հարցադրումը ո՞րն է լինելու, որ խաղաղապահներն իրենց պատասխանատվության գոտում պատշաճ չե՞ն գործում։
-Մենք նշել ենք, որ իրենք նոյեմբերի 9-ի պայմանավորվածությունը լիարժեք չեն կատարում։ Կլոր-սեղանը երկու որոշում է կայացրել. առաջինն այն էր, որ մեր իշխանություններն անմիջապես դիմեն Ֆրանսիային ու ԱՄՆ-ին, որպեսզի լրացուցիչ խաղաղապահ ուժեր ներգրավեն, քանի որ ռուսները պատշաճ ձևով իրենց պարտականությունները չեն կատարում։
-Ամբողջությամբ ռուսական գծի մեջ գտնվող իշխանություններից կա՞ն այդպիսի հույսեր։
–Որոշակի փոփոխություն կա։ Հարցն այն է, որ ռուսական գիծ տանող չինովնիկները ևս շրջափակման մեջ են, իրենք նույնպես տեսնում են, թե ինչ են կատարվում։ Ըստ դրա՝ հնարավոր է վերջիվերջո գնան բալանսավորված քաղաքականության։ Երբ մենք ասում ենք Ֆրանսիա կամ ԱՄՆ, նկատի չունենք, որ այդ երկրների դրոշը պետք է վերցնենք, ինչպես մինչ այդ ռուսինն ենք վերցրել։ Ո՛չ, մենք խոսում ենք բալանսավորված քաղաքականության մասին։ Եթե ինչ-որ տեղ մեր շահերը կհամընկնեն ռուսների հետ, շատ լավ, եթե ոչ, ուրեմն՝ ոչ։Մենք քայլում ենք՝ ելնելով մեր շահերից։ Մենք պրոռուսական չենք, պրոամերիկյան, պրոֆրանսիական չենք, մենք հայկական ենք։ Հարցերը պետք է բացահայտ ներկայացնենք, ամբողջ աշխարհն էլ պետք է իմանա, որ մենք այդպես ենք առաջ շարժվելու։
-Ստեփանակերտում տեղի ունեցած հանրահավաքի ժամանակ առաջին անգամ որևէ պետության դրոշ չբարձրացվեց, դրանից ելնելո՞վ եք նշում, որ իշխանության վարքագծում կա փոփոխություն։
–Կար Հայաստանի ու Ղարաբաղի դրոշ։ Կայացվել էր այդպիսի որոշում, որին մենք էլ էինք կողմնակից։ Մենք նաև մեկ այլ տարբերակ էինք մտածել, առ այն, որ վերցնենք ԵԱՀԿ բոլոր անդամների դրոշները։ Բայց սա վտանգավոր էր։ Հնարավոր է մի լրատվական վերցներ ու ռուսի դրոշը թեմա սարքեր, մնացածը կդառնար «կողից-կշտից»։ Դրա համար ես նախքան հավաքը ելույթ եմ ունեցել ու ասել, որ դիմել եմ ռուսական համայնքին ու խնդրել, որ իրենք էլ իրենց դրոշը չբերեն։ Ուստի տարատեսակ սադրանքներից խուսափելու համար Հայաստանի ու Արցախի դրոշն է միայն բարձրացվել։
