ՀՀ սննդամթերքի անվտանգության տեսչական մարմինը 941 տնտեսվարողի մոտ հայտնաբերել է խախտումներ:
«Արմենպրես»-ի մամուլի սրահում հրավիրված ասուլիսում ՀՀ սննդամթերքի անվտանգության տեսչական մարմնի ղեկավար Գեորգի Ավետիսյանը նշեց, որ ստուգումները եղել են ինչպես պլանային, այնպես էլ քաղաքացիների, լրատվամիջոցների, պետական կառույցների, հասարակական կազմակերպությունների բարձրացրած հարցերի հիման վրա: Ստուգումներն իրականացվել են հանրային սննդի կետերում, իրացման ցանցերում, արտադրամասերում:
«Ամենահաճախ հանդիպող խախտումներից են՝ սանիտարական գրքույկների բացակայություն, հակամիջատային ցանցերի բացակայություն, աշխատակիցների ոչ պատշաճ վիճակ, սանիտարահիգիենիկ խնդիրներ և այլն: Շատ դեպքերում տնտեսվարողների շրջանում իրազեկման խնդիր կա: Դեպքեր կան, որ տնտեսվարողները փորձում են շրջանցել օրենքը, դեպքեր էլ կան, որ, չնայած տուգանվել են, միևնույնն է՝ խախտումը կրկնել են: Այսինքն՝ անլուրջ են վերաբերվել հարցին»,-ասաց Գեորգի Ավետիսյանը:
Խախտումներ իրականացրած տնտեսվարողները ենթարկվել են պատասխանատվության՝ տուգանքներ, գործունության ժամանակավոր կասեցում և այլն:
Տոնական օրերին ընդառաջ՝ դեկտեմբերի 21-ից Սննդամթերքի անվտանգության տեսչական մարմինը, ոստիկանությունը, տեղական ինքնակառավարման մարմինները սկսել են բացօթյա ապօրինի առևտրի դեմ պայքարի գործընթաց: Մեկնարկը տրվել է Արմավիրի մարզից, բայց շարունակվում է նաև մյուս մարզերում:
«Այս խնդիրը չի լուծվի, քանի դեռ ունենք փողոցից ապրանք գնող քաղաքացիներ: Փողոցից սնունդ գնելու դեպքում նրանք ոչ միայն իրենց չեն հարգում, այլև՝ իրենց ընտանիքի անդամներին: Փողոցում վաճառվող ապրանքը գնելիս՝ 100-200 դրամ խնայում են, բայց գնում են, օրինակ, առնվազն վտանգավոր միս»,-ասաց Գեորգի Ավետիսյանը:
ՀՀ սննդամթերքի անվտանգության տեսչական մարմնի ղեկավարը հորդորում է զգոն լինել և պատահական վայրերից սնունդ չգնել: Հարցերի ու կասկածների դեպքում էլ Գեորգի Ավետիսյանը հորդորում է դիմել տեսչական մարմնին:
