«Առաջին լրատվական»-ի զրուցակիցն է Արցախի խորհրդարանի «Ազատ հայրենիք-ՔՄԴ» խմբակցության ղեկավար Արթուր Հարությունյանը։
-Պարոն Հարությունյան, ի՞նչ դիտարկումներ ունեք ՄԱԿ ԱԽ-ում Ռուսաստանի ներկայացուցչի ելույթի մասին, ինչքանո՞վ էր այն իրավիճակին համահունչ։
-Ընդհանուր առմամբ պետք է նշեմ, որ ՄԱԿ Անվտանգության խորհրդի նիստում բավականին լավ ելույթներ են հնչել, հասցեական, ստեղծված իրավիճակին ու իրականությանը համահունչ։ Ինչ վերաբերում է Ռուսաստանին, ապա այն ավելի շատ հավասարակշռված էր, քանի որ Ռուսաստանն անմիջապես եռակողմ հայտարարության կողմ է, ինչպես նաև իր խաղաղապահ ուժերով տարածաշրջանում խաղաղություն ու կայունություն ապահվող երկիր է։ Հենց հավասարակշռությունից ելնելով էլ ելույթը բովանդակային առումով այդպիսին էր։
-Բացի եռակողմ հայտարարության երաշխավորը լինելուց, նաև արցախահայության անվտանգության երաշխավորն է։
-Ես նշեցի, որ տարածաշրջանում խաղաղության ու կայունության ապահովման գլխավոր երաշխավորը հենց Ռուսաստանի Դաշնությունն է՝ ի դեմս ռուս խաղաղապահ ուժերի։
-Ավելի հասցեական կոչերի ու պահանջների անհրաժեշտություն չկա՞ր։
-Ես ասացի, որ ընդհանուր կոնտեքստում բոլորի հայտարարությունները հասցեական էին։Կարծում եմ, որ հաշվի առնելով հավասարակշռվածությունը, նաև իրենց գլխավոր դերակատարությունն այդ հարցում՝ կարող ենք ձևակերպել այնպես, որ ելույթում հնչում էին հավասարակշռված հայտարարություններ։
-Արցախի պետնախարարը նշում է, որ Հայաստանից ավելի շատ քայլեր են ակնկալում։ Ի՞նչ կարող է անել Հայաստանը, որ չի անում։
-Խնդիրն այն է, որ կա եռակողմ հայտարարություն, որի դրույթները խախտվում են։ Միջազգային հանրությունը դա տեսնում է։ Կողմերը հանդիսանում են Հայաստանը,Ադրբեջանը և Ռուսաստանը։ Բնական է, որ Ադրբեջանն իր պահվածքով փորձելու է ապակայունացնել իրավիճակը, ստեղծել այն տպավորությունը, թե չկա Լեռնային Ղարաբաղ, և առհասարակ նման հարց գոյություն չունի։ Դա կարող է անել կեղծ բնապահպանական օրակարգերով, վաղը մյուս օրը կարող է այլ հարցեր օրակարգեր մտցնել։ Բայց քանի որ կողմերը հանդիսանում են նաև Ռուսաստանն ու Հայաստանը, պետք է հասկանանք, որ այդ հայտարարությունների կատարման պահանջատերը պետք է լինեն Հայաստանն ու Ռուսաստանը, շահառուն էլ՝ Արցախի ժողովուրդը։ Դրա համար էլ այս կարգի կոպիտ խախտումները՝ դա կարող են լինել հրադադարի ռեժիմի խախտումները, Լաչինի միջանցքի անխափան երթևեկությունը, Արցախի ժողովրդի անվտանգությունը, պետք է շատ կոշտ արձագանքների արժանան Հայաստանի ու Ռուսաստանի կողմից՝ որպես եռակողմ հայտարարության ստորագրողներ։Մենք իհարկե կոշտ ենք արձագանքում Ադրբեջանի գործողություններին, բայց այդ արձագանքն այնքան ազդեցիկ ու առարկայական չի ստացվում, ինչքան որ դա կարող են անել եռակողմ հայտարարության կողմերը։
-Իսկ Հայաստանը չի՞ անում դա։
-Ես չեմ ասում՝ չի անում, բայց արդեն տաս օր է՝ Արցախի ժողովուրդը գտնվում է շրջափակման մեջ և հասունանում է հումանիտար աղետ։ Շատ լուրջ քայլ կլիներ, որ պահանջվեր եռակողմ հրատապ հանդիպում։ Այդ եռակողմ հրատապ հանդիպման ընթացքում պետք է քննարկվեին, հստակեցվեին այդ հարցերը, նման կեղծ օրակարգով ահա այսպիսի իրավիճակներ բացառելը։ Իհարկե քայլեր արվում են, Երեկվա ՄԱԿ ԱԽ-ի նիստում էլ Հայաստանի ներկայացուցիչը շատ հստակ, բովանդակալից ու ընդհանուր իրավիճակն օբյեկտիվ ներկայացնող ելույթ ունեցավ։ Դա շատ կարևոր էր, պետք էր հենց այդպես ներկայացնել, որ ամբողջ աշխարհն էլ իմանա, թե ինչ է տեղի ունենում և ոչ թե սահմանափակվի Ադրբեջանի տարածած կեղծ տեղեկություններով, որոնք ընդհանարպես իրականությանը չեն համապատասխանում։ Նրանք նշում էին, թե ճանապարհը բաց է, խոչընդոտներ չկան, բայց մենք բոլորս հասկանում ենք, որ դա սովորական կեղծիք է։Այդ կոնտեքստում ՀՀ ներկայացուցչի բովանդակային ելույթը շատ կարևոր էր, որպեսզի ամբողջ աշխարհն իմանա իրականությոնը։