Արդարադատության նախարարի խորհրդական Արտյոմ Սուջյանը մասնակցել է Վենետիկի հանձնաժողովի նիստին, որտեղ քննարկվել է «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին օրենքի նախագիծը, որով, մասնավորապես, առաջարկվում է ներդնել դատավորին կարգապահական պատասխանատվության ենթարկելու հարցի քննության արդյունքում կայացվող որոշումների բողոքարկման կառուցակարգ:
Նիստի շրջանակներում իրականացվել է մտքերի փոխանակում՝ նախարարի խորհրդականի և հանձնաժողովի ներկայացուցիչների միջև, որից հետո հաստատվել է հանձնաժողովի կարծիքը նախագծի վերաբերյալ, որով հանձնաժողովը դրական է գնահատել առաջարկվող բարեփոխումների իրականացումը և ընդգծել, որ նախագիծը նպատակ է հետապնդում արձագանքել հանձնաժողովի կողմից նախկինում արված առաջարկություններին:
Վենետիկի հանձնաժողովի կարծիքն արդեն իսկ հրապարակվել է հանձնաժողովի պաշտոնական կայքում:
Այս առնչությամբ փաստաբան Ալեքսանդ Սիրունյանը «Առաջին լրատվական»-ի հետ զրույցում նշեց. «Երբ որևէ գործով Եվրոպական դատարանը կայացնում է որոշումը, որը հակասում է Հայաստանի դատարանի դիրքորոշմանը, այդ գործով դատավորն ու դատախազը պետք է դատվեն Հայաստանում, ոչ թե կարգապահական տան նրանց: Ի՞նչ է նշանակում կարգապահական տանք, նկատողություն անենք, կամ գործից հանենք, ոչ, դատավորն ու դատախազը պետք է դատվեն: Կամ իրենց պետք է տանել հոգեբուժական փորձաքննության, ասենք՝ ընկեր ջան, երբ դու այդպիսի բան ես գրել, դու անգրագե՞տ ես, թե՞ չարամիտ տականք»:
Նա նկատեց, որ դրանք ոչ միայն քաղաքական նկատառումներով պայմանավորված վճիռներ են. «Դրանք եղել են ամուսնալուծությունների, եղել են գույք բաժանելու, իրարից հողամաս, բենզալցակայան խլելու և այլ տարբեր վճիռներ: Մեր դատավորները պետք է հասկանան, որ էդ չագուչը մի օր իրենց գլխին պետք է ընկնի: Դատավոր լինելը «նարուշիլովկա» չի, արտոնություն չի, դատավոր լինելը ժողովրդին ծառայելու պարտականություն է: Կադաստրի պետը դեռ կարող է մեկ-մեկ էշություն անի, դատավորն իրավունք չունի: Դրա համար հենց Եվրոպական դատարանից այդ որոշումն եկավ, այդ դատավորն ու դատախազը պետք է դատվեն, որ մյուսներին խրատ լինի: Հենց որ երկու դատավոր, երկու դատախազ ու երկու քննիչ դատվի, բոլորը խելքի կգան»,-ասաց փաստաբանը: Սիրունյանը համոզված է, որ դա միակ ձևն է կանխելու ապօրինի որոշումները. «Որովհետև իրենք հույս ունեն և մտածում են՝ կգնանք ԲԴԽ, նկատողություն կստանանք և վերջ: Ոչ, դու պետք է դատվես:
Կամ էդ գործից յան տուր, կամ ինքնաբացարկ հայտնիր, կամ ասա՝ իմ խելքի բանը չի, կամ դատավոր մի աշխատիր, բայց հիման վճիռ մի կայացրու: Դատարանը մի տեղ է, որտեղ ճիշտն ու սխալն են որոշում, կադաստրի պետի հիմարությունը կարող է ավարտվել նկատողությունով, դատավորինը չի կարող: Դու ճակատագիր ես որոշում»,-ընդգծեց նա: