Նախօրեին հայտարարվեց, որ Հայաստանի պետական հետաքրքրությունների ֆոնդը (ԱՆԻՖ) այսուհետ չի կառավարելու «Զանգեզուրի պղնձամոլիբդենային կոմբինատ» ՓԲԸ-ի (ԶՊՄԿ) ՀՀ կառավարության բաժնեմասը, որն ԱՆԻՖ-ի կառավարմանն էր հանձնվել 2022 թ. ՀՀ կառավարության որոշմամբ։
ՀՀ կառավարության նոր որոշմամբ ԶՊՄԿ-ի ՀՀ կառավարությանը պատկանող բաժնեմասը կառավարման կհանձնվի ՀՀ պետական գույքի կառավարման կոմիտեին։
Այս առնչությամբ, բնապահպան Ինգա Զարաֆյանը «Առաջին լրատվական»-ի հետ զրույցում նշեց, որ դա պայմանավորված է կառավարման ներքին խնդիրներով. «Նրանք, իմ կարծիքով խնդիրներ ունեն, թե ով ինչի համար է պատասխանատու, ով պետք է կառավարի այս կամ այն ոլորտը: Դա զուտ իրենց ներքին խնդիրներն են: Դրանից մեզ համար ոչինչ չի փոխվում, գործունեության թափանցիկության առումով որեւէ փոփոխություն չկա: Այն իրավիճակը, որ մենք ունենք «Զանգեզուրի պղնձամոլիբդենային կոմբինատի» հետ կապված, չի փոխվել»,-ասաց նա:
Զարաֆյանի խոսքով, Զանգեզուրի կոմբինատի բաժնետոմսերում պետական մասնաբաժնի առկայությունն առաջին հերթին նշանակում է պետական վերահսկողություն կոմբինատի ողջ գործունեության վրա. «Նախ, մեզ համար անհայտ եւ մութ են այդ գործարքի պայմանները, ի՞նչ պայմաններով են բաժնետոմսերը հանձնվել պետությանը: Երկրորդ, ինչ ձեւով է իրականացվում այդ պետական վերահսկողությունը, մենք չենք տեսել որեւէ որոշում կամ հրաման, որեւէ իրավական վարչական ակտ, որը կվկայի, որ այդ վերահսկողությունը կա: Եթե այդ բաժնետոմսերը այլ կազմակերպության փոխանցելու ժամանակ մենք տեսնենք հստակ վարչական ակտեր, այդ ժամանակ միայն պարզ կլինի պատճառը, թե ինչու են փոխանցել: Որովհետեւ մենք չգիտենք, թե ինչ հանգամանքներում են այդ բաժնետոմսերը փոխանցվել եւ ինչ պայմաններով»,-ընդգծեց բնապահպանը:
Ինչ վերաբերում է նրան, որ Զանգեզուրի պղնձամոլիբդենային կոմբինատը ամենաշատ հարկերն է մուծել, Զարաֆյանն ասաց. «Բնական է, որ Զանգեզուրի կոմբինատը ամենաշատ հարկերն է վճարել, որովհետեւ եթե կշեռքի մի նշարին դնես այդ կոմբինատի արդյունաբերական ծավալը եւ շահույթը, իսկ մյուս նժարին բոլոր մնացած մետաղական հանքերի ծավալն ու շահույթը, հաստատ ԶՊՄԿ-ի կողմը ծանր կլինի: Դա համաշխարհային նշանակության հանք է»: