ՄԱԿ ԱԽ նիստում Ադրբեջանի քայլը՝ Լաչինի միջանցքի արգելափակումը, արժանացավ միահամուռ դիտողության և կոչի՝ բացել և ապահովել տեղաշարժը: Հարց է առաջանում, միթե՞ Ալիևը ակնկալում էր, թե Հայաստանը չի դիմելու ՄԱԿ ԱԽ, կամ ՄԱԿ ԱԽ-ում չի լինելու միաձայն դիրքորոշում և կոչ՝ բացել ճանապարհն ու վերացնել մարդասիրական ճգնաժամի ռիսկը: Թեմայի շուրջ «Առաջին լրատվական»-ը զրուցել է «Ռեգիոն» հետազոտական կենտրոնի տնօրեն Լաուրա Բաղդասարյանի հետ:
Բաղդասարյանը չի կարծում, որ ՄԱԿ ԱԽ-ից հնչած կոչերը խանգարելու են Ալիևին իրականացնել իր ծրագրերը. «Ադրբեջանը իրականացնում է կարևոր խնդիր իր համար` ԼՂ-ում հաստատել իր իրավազորությունը: Ադրբեջանը հումանիտար աղետ ստեղծելով` իրականացնում է իր քաղաքական նպատակը: Լաչինի միջանցքում Ադրբեջանը քաղաքական հարց է լուծում: ՀՀ սուվերեն իրավունքն էր երաշխավորել Արցախի բնակչության իրավունքները միջազգային ատյաններում: Արցախի բնակչության իրավունքները ռուս խաղաղապահների իրավասության մեջ չեն մտնում»:
Ըստ Բաղդասարյանի` Ադրբեջանի կողմից կոպտագույն խախտումներ են, որը ՌԴ պաշտոնական մակարդակով թույլ է տրվում: