Աֆղանստանի Փարվանի նահանգի Սալանգի լեռնանցքի թունելում բենզատարի պայթյունը եղել Է նախապես ծրագրված ահաբեկչություն, հայտնել է աֆղանական Hasht e Subh թերթը։
Այս մասին տեղեկանում է ТАСС գործակալությունից։ Թերթի աղբյուրները, վկայակոչելով «Թալիբան» արմատական շարժման կողմից նշանակված Աֆղանստանի ժամանակավոր կառավարության ներքին գործերի նախարարության հաշվետվությունը, պնդում են, որ թունելում բռնկված հրդեհը մի քանի ականների պայթեցման հետևանք է, որոնցից մեկը տեղադրված է եղել բենզատարում:
Թերթի զրուցակիցների խոսքով՝ պայթյունները որոտացել են տարբեր ժամանակ։ Նրանք կատարվածը համարել են ահաբեկչական գործողություն։ Մինչդեռ մեկ այլ աղբյուր հրատարակությանը հայտնել է, որ երկու պայթյուն է որոտացել դեկտեմբերի 17-ին, ևս երկուսը` դեկտեմբերի 18-ին։ Վերջին տվյալներով՝ զոհերի թիվը հասել է 100-ի, առնվազն 120 մարդ վիրավորվել է։
