Ռուսաստանի ներկայացուցիչ Աննա Եվստեգնեևան մտահոգություն է հայտնել Լաչինի միջանցքի արգելափակման կապակցությամբ, որն առաջացել է «տարածաշրջանում հանքերի շահագործման շուրջ տարաձայնությունների արդյունքում»: Նշելով, որ միջանցքն ապահովում է Լեռնային Ղարաբաղի և Հայաստանի միջև կապը, Եվստեգնեևան ասել է, որ այն գտնվում է ռուսական խաղաղապահ զորախմբի վերահսկողության տակ և մնում է տարածաշրջանում կայունության երաշխավորը՝ արդյունավետ կատարելով իր խնդիրները: ՌԴ ներկայացուցիչը հիշեցրել է, որ երկու կողմերն էլ ստանձնել են պարտավորություններ, որոնք պետք է խստորեն պահպանվեն, այդ թվում՝ պարտավորություն՝ ապահովելու, որ քաղաքացիական անձինք դժվարություններ չունենան, և ասել է, որ իր երկիրն ակնկալում է, որ տրանսպորտային միջանցքը լիարժեք կվերականգնվի «շատ մոտ ապագայում»:
ՌԴ ներկայացուցիչը հավելել է, որ վերջին օրերի ընթացքում Ռուսաստանը կանոնավոր շփումներ է կազմակերպել Հայաստանի և Ադրբեջանի հետ, և արդյունքում վերսկսվել են գազի մատակարարումները Լեռնային Ղարաբաղ, մասամբ բացվել է Լաչինի միջանցքը երթևեկի համար, և համաձայնեցվել են Ադրբեջանի կողմից Լեռնային Ղարաբաղի հանքահորեր այցելելու պարամետրերը։ Հայտարարելով, որ Ռուսաստանն ակնկալում է, որ Մոսկվայի միջնորդությամբ ձեռք բերված բոլոր պայմանավորվածությունները կատարվեն, նա կոչ է արել Ադրբեջանին և Հայաստանին՝ զսպվածություն ցուցաբերել, զերծ մնալ լարվածությունն ուժեղացնող քայլերից և պահպանել երեք երկրների ղեկավարների եռակողմ հայտարարություններում ձեռք բերված պայմանավորվածությունները: «Այդ դրույթների ամբողջական իրագործումը Բաքվի և Երևանի հարաբերությունների կարգավորման ամենակայուն միջոցն է»,- հավելել է ՌԴ ներկայացուցիչը:
