Արդեն 8-րդ օրն է «Զվարթնոց» օդանակավակայանից թռիչքները իրականացվում են առանց Արցախից ուղևորների: Ադրբեջանը շարունակում է փակ պահել Արցախը աշխարհին կապող միակ ավտոճանապարհը: Բոլոր այն ուղևորները, որոնք նախապես տոմս էին գնել, թռիչքի վայր հասնելու հնարավորություն չունեն:
Տարվա այս սեզոնին շրջագայել ցանկացողների թիվը մեծ է, ամանորյա տոներով պայմանավորված Արցախ՝ բարեկամներին տեսակցության եկած մարդկանց թիվը՝ ևս: Հետևաբար բոլոր այդ մարդկանց անհանգստությունները պետք է փարատվեն, իսկ հրատապ հարցերին պատասխանել է պետք:
Առաջին հայացքից չես նկատի, որ Արցախում ավիոտոմսերի վաճառքով զբաղվող ընկերություններում աշխատանքը եռում է, սրահի աթոռներն ազատ են, փոխարենը հեռախոսազանգերը չեն լռում:
Առավել մեծ սպասումներ կային հատկապես հայկական ավիաընկերություններից, քանի որ նրանց համար ստեղծված իրավիճակն առավել տեսանելի էր: Սակայն ըմբռնումով մոտեցան նաև միջազգային ավիափոխադրողները:
Ցավոք, ոչ բոլոր ուղևորների բախտն է բերել: Ստեղծված արտակարգ իրավիճակը որոշ ընկերություններ միանգամայն սովորական որակեցին:
Ստեղծված իրավիճակում ոչ մի արտառոց բան չնկատող ավիաընկերության ուղևորի ճակատագիրը շարունակում է անհայտ մնալ՝ եթե ճանապարհը մինչև նշված օրը չբացվի, և՛ տոմսի համար վճառված գումարն է կորցնելու, և 50եվրո վճարված տուգանքը: