Դեկտեմբերի 18-ին Սուրբ Գայանե վանքում հավարտ Սուրբ և Անմահ Պատարագի, հանդիսապետությամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի, կատարվեց խաղաղության և զորակցության աղոթք հանուն Արցախի։
Հընթացս արարողության Մայր Աթոռ Սուրբ Էջմիածնի միաբանությունը և ներկա հավատացյալ ժողովուրդն աղոթք վերառաքեցին առ Աստված Հայաստան ու Արցախ մեր հայրենիքի խաղաղության և համայն հայ ժողովրդի անվտանգ ու ապահով կյանքի համար։
Վերջում Ամենայն Հայոց Կաթողիկոսն իր պատգամը հղեց արցախցիներին և համայն հայությանը՝ ի մասնավորի ընդգծելով․ «Այս օրերին վերստին վրդովված ու մտահոգ սրտերով ամենքիս հայացքները ուղղված են դեպի հայոց Արցախ աշխարհը։ Արդեն յոթ օր Ադրբեջանի իշխանությունները ակնհայտ սադրիչ գործողություններով և կեղծ պատճառաբանություններով փակ են պահում Արցախի՝ Հայաստանի և աշխարհի հետ կապի միակ ճանապարհը՝ մատնելով արցախցիներին հումանիտար աղետի:
Արգելափակված 120․000 արցախցի մեր քույրեր ու եղբայրներ զրկված են ազատ տեղաշարժի հնարավորությունից, բազմաթիվ հիվանդներ՝ անհրաժեշտ բուժօգնությունից, Արցախի հանրապետությունը՝ կենսական մատակարարումներից»:
Նորին Սրբությունը, անդրադառնալով ողբերգական այս իրողություններին, նշեց․ «Այսօր Ադրբեջանը վախի ներշնչման միջոցով փորձում է հայաթափել Արցախը: Անհնար է երևակայել, որ մարդուն և նրա արժանապատիվ ու ազատ կյանքը բարձրագույն արժեք հռչակած ներկա աշխարհում հնարավոր է, որ տեղ գտնեն և հանդուրժվեն հակամարդկային նմանօրինակ դրսևորումներ մի ողջ ժողովրդի նկատմամբ»։
Վեհափառ Հայարապետը, նկատելով, որ միայն դատապարտության խոսքերը բավարար չեն զսպելու Ադրբեջանի ծավալապաշտական նկրտումները և կասեցնելու վերջինիս թշնամական ընթացքը, ընդգծեց, որ Հայաստանյայց Առաքելական Սուրբ Եկեղեցին շարունակելու է ջանքեր գործադրել, որպեսզի միջազգային հանրությունը, բարեկամ պետությունները, քրիստոնեական քույր Եկեղեցիները, միջազգային և միջեկեղեցական կազմակերպությունները հնարավոր աջակցություն ու զորակցություն ապահովեն Արցախին և Արցախի հայ ժողովրդի զավակներին:
Դիմելով արցախցիներին՝ Հայոց Հայրապետն ասաց․ «Սիրելի արցախցիներ, Մայր Աթոռ Սուրբ Էջմիածնից մեր աղոթքներն ու զորակցությունն ենք բերում ձեզ: Ազատ, անկախ և անվտանգ ապրելու ձեր արդար պահանջի մեջ ազգս հայոց միասնական է: Շարունակեք մնալ աննկուն, հավատով ամուր և ապրեք ամենօրյա մեծ և փոքր հաղթանակների լավատեսությամբ: Արիաբար պիտի դիմակայենք մեզ պատուհասած բոլոր արհավիրքները, որպեսզի Արցախը ապրի արցախցու ոգով, ծնունդ առնող մանուկների ճիչերով, հայկական հարուստ վկայություններով, պատմական շեներով ու բազմադարյա սրբավայրերով»:
Նորին Սրբությունը հորդորով դիմեց նաև Հայաստանում և սփյուռքում ապրող հայորդիներին․ «Արցախը և արցախահայության իրավունքների պաշտպանությունը մեր ժողովրդի արժանապատվության հարցն է։ Այն արժանապատվության հարցն է յուրաքանչյուր հայի, ուր էլ որ նա ապրի՝ Հայաստանում, թե սփյուռքում։ Արցախի մեր ժողովուրդը կարիքն ունի ամեն մեկիս ուշադրության և աջակցության։ Արցախահայության հիմնախնդիրների կարգավորումը անսակարկ առաջնահերթություն է և չի կարող փոխարինվել որևէ այլ մտահոգությամբ։ Գիտակցենք, որ Արցախը մեր հայրենիքն է, Հայաստանի ու Արցախի շահերը՝ նույնական, իսկ Արցախի անվտանգությունը անքակտելիորեն կապված է Հայաստանի անվտանգությանը։
Հայրապետական Մեր պատգամն ենք բերում համայն մեր ժողովրդին՝ թոթափել անտարբերության ցանկացած դրսևորում, լինել առավել վճռական ու գործուն՝ միահամուռ ջանքերով ու պատասխանատվությամբ հետամուտ լինելու և աջակցելու արցախահայության իրավունքների, Արցախի ազատ ու անկախ կյանքի պաշտպանությանը։ Սա ազգային մեր ինքնության պահպանության պայքար է»։
Նորին Սրբությունը մաղթեց, որ Տիրոջ բարեգութ կամքով Հայաստանում և Արցախում հաստատվի հարատև արժանապատիվ խաղաղություն՝ ի բարօրություն սրբազան մեր հայրենիքի և աստվածասեր ժողովրդի։
ԱՒԱՆԴԱԿԱՆ ՈՒՂՂԱԳՐՈՒԹԵԱՄԲ
Կատարուեց խաղաղութեան եւ զօրակցութեան աղօթք յանուն ԱրցախիԴեկտեմբերի 18-ին Սուրբ Գայանէ վանքում հաւարտ Սուրբ եւ Անմահ Պատարագի, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, կատարուեց խաղաղութեան եւ զօրակցութեան աղօթք յանուն Արցախի:
Հնթացս արարողութեան Մայր Աթոռ Սուրբ Էջմիածնի միաբանութիւնը եւ ներկայ հաւատացեալ ժողովուրդն աղօթք վերառաքեցին առ Աստուած Հայաստան ու Արցախ մեր հայրենիքի խաղաղութեան եւ համայն հայ ժողովրդի անվտանգ ու ապահով կեանքի համար:
Վերջում Ամենայն Հայոց Կաթողիկոսն իր պատգամը յղեց արցախցիներին եւ համայն հայութեանը` ի մասնաւորի ընդգծելով․ «Այս օրերին վերստին վրդովուած ու մտահոգ սրտերով ամէնքիս հայեացքները ուղղուած են դէպի հայոց Արցախ աշխարհը: Արդէն եօթ օր Ադրբեջանի իշխանութիւնները ակնյայտ սադրիչ գործողութիւններով եւ կեղծ պատճառաբանութիւններով փակ են պահում Արցախի` Հայաստանի եւ աշխարհի հետ կապի միակ ճանապարհը` մատնելով արցախցիներին հումանիտար աղէտի:
Արգելափակուած 120․000 արցախցի մեր քոյրեր ու եղբայրներ զրկուած են ազատ տեղաշարժի հնարաւորութիւնից, բազմաթիւ հիւանդներ` անհրաժեշտ բուժօգնութիւնից, Արցախի հանրապետութիւնը` կենսական մատակարարումներից»:
Նորին Սրբութիւնը, անդրադառնալով ողբերգական այս իրողութիւններին, նշեց․ «Այսօր Ադրբեջանը վախի ներշնչման միջոցով փորձում է հայաթափել Արցախը: Անհնար է երեւակայել, որ մարդուն եւ նրա արժանապատիւ ու ազատ կեանքը բարձրագոյն արժէք հռչակած ներկայ աշխարհում հնարաւոր է, որ տեղ գտնեն եւ հանդուրժուեն հակամարդկային նմանօրինակ դրսեւորումներ մի ողջ ժողովրդի նկատմամբ»:
Վեհափառ Հայարապետը, նկատելով, որ միայն դատապարտութեան խօսքերը բաւարար չեն զսպելու Ադրբեջանի ծաւալապաշտական նկրտումները եւ կասեցնելու վերջինիս թշնամական ընթացքը, ընդգծեց, որ Հայաստանեայց Առաքելական Սուրբ Եկեղեցին շարունակելու է ջանքեր գործադրել, որպէսզի միջազգային հանրութիւնը, բարեկամ պետութիւնները, քրիստոնէական քոյր Եկեղեցիները, միջազգային եւ միջեկեղեցական կազմակերպութիւնները հնարաւոր աջակցութիւն ու զօրակցութիւն ապահովեն Արցախին եւ Արցախի հայ ժողովրդի զաւակներին:
Դիմելով արցախցիներին` Հայոց Հայրապետն ասաց․ «Սիրելի արցախցիներ, Մայր Աթոռ Սուրբ Էջմիածնից մեր աղօթքներն ու զօրակցութիւնն ենք բերում ձեզ: Ազատ, անկախ եւ անվտանգ ապրելու ձեր արդար պահանջի մէջ ազգս հայոց միասնական է: Շարունակէք մնալ աննկուն, հաւատով ամուր եւ ապրէք ամենօրեայ մեծ եւ փոքր յաղթանակների լաւատեսութեամբ: Արիաբար պիտի դիմակայէնք մեզ պատուհասած բոլոր արհաւիրքները, որպէսզի Արցախը ապրի արցախցու ոգով, ծնունդ առնող մանուկների ճիչերով, հայկական հարուստ վկայութիւններով, պատմական շէներով ու բազմադարեայ սրբավայրերով»:
Նորին Սրբութիւնը յորդորով դիմեց նաեւ Հայաստանում եւ սփիւռքում ապրող հայորդիներին․ «Արցախը եւ արցախահայութեան իրաւունքների պաշտպանութիւնը մեր ժողովրդի արժանապատուութեան հարցն է: Այն արժանապատուութեան հարցն է իւրաքանչիւր հայի, ուր էլ որ նա ապրի` Հայաստանում, թէ սփիւռքում: Արցախի մեր ժողովուրդը կարիքն ունի ամէն մէկիս ուշադրութեան եւ աջակցութեան: Արցախահայութեան հիմնախնդիրների կարգաւորումը անսակարկ առաջնահերթութիւն է եւ չի կարող փոխարինուել որեւէ այլ մտահոգութեամբ: Գիտակցենք, որ Արցախը մեր հայրենիքն է, Հայաստանի ու Արցախի շահերը` նոյնական, իսկ Արցախի անվտանգութիւնը անքակտելիօրէն կապուած է Հայաստանի անվտանգութեանը:
Հայրապետական Մեր պատգամն ենք բերում համայն մեր ժողովրդին` թօթափել անտարբերութեան ցանկացած դրսեւորում, լինել առաւել վճռական ու գործուն` միահամուռ ջանքերով ու պատասխանատուութեամբ հետամուտ լինելու եւ աջակցելու արցախահայութեան իրաւունքների, Արցախի ազատ ու անկախ կեանքի պաշտպանութեանը: Սա ազգային մեր ինքնութեան պահպանութեան պայքար է»:
Նորին Սրբութիւնը մաղթեց, որ Տիրոջ բարեգութ կամքով Հայաստանում եւ Արցախում հաստատուի յարատեւ արժանապատիւ խաղաղութիւն` ի բարօրութիւն սրբազան մեր հայրենիքի եւ աստուածասէր ժողովրդի:
