Արևիկ Մելքոնյանը հաշմանդամություն ձեռք է բերել մանկուց։ «Կյանքը՝ երկրորդ փորձից» հաղորդման շրջանակներում Արևիկը պատմեց, որ ինքը հաշմանդամության հետ մեծացել է, քանի որ քայլելու խնդիրն ի հայտ է եկել 1 տարեկանից սկսած։ Անցել է տարատեսակ հետազոտություններ, տևական ժամանակ սխալ բուժումներ ստացել և շատ ժամանակ անց նոր պարզվել է , որ ամենայն հավանականությամբ, փոքր հասակում ընկնելու հետևանքով վնասվել է ողնաշարը։
Քայլելու դժվարությունն Արևիկին չի ընկճել, նա ծանրամարտիկ է։ Բացի այդ՝ նպատակ է դրել անպայման մայրանալ և այժմ ունի 4 տարեկան որդի՝ Դավիթը։ Պատմում է, որ երբ անվասայլակով գնում էր հետազոտությունների՝ բժիշկները նույնիսկ չէին հավատում, որ նա հղի է, դժվարությամբ էին համաձայնվում ուլտրաձայնային հետազոտություն անցկացնել։