Հայաստանի վարչապետ Նիկոլ Փաշինյանը կառավարության նիստում հայտարարել է, որ արտգործնախարարությանը հանձնարարում է ԱԺ նախօրեին ընդունած հայտարարության ուղերձը հասցնել հասցեատերերին: «Ազգային ժողովը նաև ՄԱԿ-ի անվտանգության խորհրդին, ԵԱՀԿ ՄԽ համանախագահող և անդամ երկրներին կոչ է արել հումանիտար իրավիճակի մոնիթորինգի նպատակով փաստահավաք առաքելություն ուղարկել ԼՂ: Արտաքին գործերի նախարարությանը՝ ՀՀ բարձրագույն օրենսդիր մարմնի այս ուղերձն արդյունավետ կերպով հասցնել հասցեատերերին», հայտարարել է Փաշինյանը: Սա քայլ է, որ Հայաստանը մի կողմից կարծես թե պետք է անի որպես նվազագույն, մյուս կողմից սակայն հարց կա, թե որքանով է այն հեռանկարային և իրատեսական, հատկապես հաշվի առնելով երկու հանգամանք՝ այդ քայլի համար նախ հարկավոր է ներկայումս միմյանց դեմ սուր հակադրության մեջ, փաստացի պատերազմի մեջ գտնվող տերությունների կոնսենսուս, և բացի այդ էլ պետք է թերևս Ադրբեջանի համաձայնություն:
Հնարավոր է իհարկե երկրների խմբի որոշում՝ ձևավորել փաստահավաք առաքելություն և իրագործել այն, բայց շատ բարդ է պատկերացնել, որ դա տեղի ունենա առանց Բաքվի համաձայնության, որովհետև դա կնշանակի գնալ Ադրբեջանի դեմ ու վտանգել Բաքվի հետ հարաբերությունը: Միջազգային դերակատարներից ո՞վ է պատրաստ գնալ այդպիսի քայլի: Ավելին, պետք չէ թերևս բացառել նաև խնդրի մյուս կողմը, այն է՝ գնալ այդօրինակ քայլի, ու Ադրբեջանին մղել ավելի սուր գործողությունների, այդպիսով ավելի լարելով իրադրությունը ռեգիոնում և ընդհուպ առաջացնելով բախումային սցենարի բարձր հավանականություն: Իսկ այն, որ այդպիսի սցենար կա, առնվազն այն երկրներում, որոնք ունեն ներկայիս Իրանին ու ՌԴ-ին հարվածելու խնդիր, թերևս անկասկած է:
