«Ղարաբաղի ազգային ազատագրական շարժումը ցնցեց ոչ միայն Կովկասը, այլ ամերիկահայությանը»: Այսօր լրագրողների հետ հանդիպման ժամանակ նշեց ԱՄՆ-ում ԼՂՀ առաջին ներկայացուցիչ Արտեմ Հարությունյանը:
Նա պատմեց, թե ինչպես է սկսվել իր գործունեությունը` շեշտելով, որ իր աշխատանքի հիմնական նպատակը եղել է Ամերիկայի հայ համայնքի հետ աշխատելը և Ղարաբաղի անկախության վերաբերյալ բոլորին տեղեկատվություն հաղորդելը: Հարությունյանը նկատեց որ իր նպատակներից մեկն էլ ամերիկյան ԶԼՄ-ներով ղարաբաղյան շարժման մասին իրողությունը տարածելն էր։ Իր հարցազրույցները ամերիկյան «Նյու Յորք թայմս» և «Լոս Անջելես թայմս» պարբերականներում բավակնին մեծ արձագանք էին ստանում և թուրքերը սաստիկ կատաղում էին, որ Ամերիկայում Ղարաբաղը ներկայացուցիչ ունի:
Արտեմ Հարությունյանը նկատեց, որ սկզբնական շրջանում իր գործունեությունը մեկուսացված էր, քանզի ամերիկահայությունը չէր սպասում, որ այդքան շուտ Ղարաբաղը ներկայացուցիչ կունենա ԱՄՆ-ում: Հետադարձ հայացք գցելով՝ Հարությունյանը նշեց որ այն երկու տարիները, որոնց ընթացքում ինքը եղել է ԼՂՀ ներկայացուցիչ ԱՄՆ-ում, բավականին արդյունավետ են եղել, սակայն կան նաև չարված գործեր: Նա նշեց, որ ԱՄՆ շատ քաղաքներում ինքը չի հասցրել լինել և այդ երկրում իր աշխատանքն ինչ-որ չափով կիսատ է մնացել:
