Թուրքիայի և Հայաստանի հատուկ ներկայացուցիչները շարունակում են երկխոսությունը երկկողմ հարաբերությունների կարգավորման շուրջ։ Այս մասին հայտարարել է Թուրքիայի արտգործնախարար Մևլութ Չավուշօղլուն, փոխանցում է Անադոլու գործակալությունը։
«Կողմերը նախապես համակարգված քայլեր են ձեռնարկել օդային տարածքը բացելու ուղղությամբ։ Թուրքիան մի շարք որոշումներ է ընդունել օդային տրանսպորտի ոլորտում, որոնք միտված են եղել վստահության բարձրացմանը։ Կարծում եմ, որ Երևանը նույնպես պետք է անկեղծ քայլեր կատարի Անկարայի հետ երկխոսության հարցում»,- նշել է նա։
Նրա խոսքով՝ Հայաստանը պետք է արձագանքի Թուրքիայի քայլերին. «Ադրբեջանի և Թուրքիայի դիրքորոշումները չափազանց բաց են, հետևաբար, անկասկած, Երևանի անկեղծ քայլերն անպատասխան չեն մնա։ Հստակ քայլերը կարևոր են Հարավային Կովկասում խաղաղության և կայունության համար։ Հայաստանը պետք է որքան հնարավոր է շուտ խաղաղության պայմանագիր ստորագրի»,- ասել է թուրք նախարարը։
Չավուշօղլուն նշել է՝ կողմերը պետք է գիտակցեն, որ բոլոր որոշումները պետք է բխեն հենց տարածաշրջանի երկրներից։
Անդրադառնալով Լաչինի միջանցքի տարածքում իրավիճակի սրմանը՝ թուրք նախարարը հիշեցրել է, որ ռուս զինվորականները ժամանել են տարածաշրջան՝ խաղաղություն ապահովելու նպատակով։ «Ռուսների առաքելությունը խաղաղություն պահպանելն է։ Միաժամանակ, ռուսական կողմը պետք է համագործակցի Բաքվի հետ, իսկ այնտեղ ապրող հայերը չպետք է խանգարեն փորձագետների այցերին»,- ընդգծել է Չավուշօղլուն՝ հավելելով, որ Թուրքիան աջակցում է Ադրբեջանին իր քայլերում։