Այսօր Երևանի ժամանակով 23։00-ին տեղի կունենա աշխարհի առաջնության կիսաեզրափակչի առաջին՝ Արգենտինա-Խորվաթիա հանդիպումը։ Բուքմեյքերներն ու վերլուծաբաններն այս դիմակայության բացահայտ ֆավորիրտ են համարում արգենտինացիներին։ Վերջիններիս խաղի հիմնական ժամանակում հաղթանակի համար սահմանված է 1․95 գործակից։ Ոչ-ոքին գնահատված է 3․3, իսկ Խորվաթիայի հաղթանակը՝ 4․8 գործակցով։ Արգենտինայի եզրափակիչ դուրս գալու գործակիցը, 1․43, իսկ Խովրաթիայի անցումը գնահատված է 3 գործակցով։ Չմոռանանք, որ քառորդ եզրափակչում մեծ անահկնալ մատուցելով խորվաթները հետխաղային 11 մետրանոց հարվածաշարում հաղթել էին մրցաշարի գլխավոր ֆավորիտ, աշխարհի հնգակի չեմպիոն Բրազիլիային։ Համեմատության համար նշենք, որ Խորվաթիայի դեմ խաղում Բրազիլիայի հաղթանակի գործակիցն ընդամենը 1․25 էր։ Վերջին անգամ Արգենտինայի և Խորվաթիայի միջև հանդիպումը տեղի է ունեցել աշխարհի նախորդ առաջնության խմբային փուլի երկրորդ տուրում։ Անտե Ռեբիչի, Լուկա Մոդրիչի եւ Իվան Ռակիտիչի գոլերի շնորհիվ խորվաթները հաղթել էին խոշոր 3:0 հաշվով։
«Խորվաթիան արդեն իսկ աշխարհի լավագույն հավաքականների քառյակում է և դա մեծ հաջողություն է մեր երկրի համար։ Մենք հիանալի աշխատանք ենք կատարել վերջին երկու աշխարհի առաջնություններում։ Հիմա ուզում ենք ավելի մեծ նվաճման հասնել, մենք խաղում ենք մեծն Արգենտինայի դեմ, գերազանց թիմի՝ Լեո Մեսիի գլխավորությամբ։ Նրանց վրա ավելի մեծ ճնշում կա, մենք գիտենք նրանք ինչպես են խաղում, հանուն ինչի են ուզում հաղթել այս խաղը։Ես վստահում եմ խաղացողներին, մենք շատ ադապտացվելու կարիք չունենք։ Խորվաթիան իր խաղաոճը կպարտադրի։ Ոմանք թերահավատորեն վերաբերվեցին իմ այն հայտարարությանը, որ Բրազիլիայի դեմ խաղում Խորվաթիան պատրաստ է սենսացիա մատուցել։ Բայց մենք արեցինք դա ապացուցելով, որ Խորվաթիայի համար անհաղթահարելի մրցակիցներ չկան»,- ասել է Խորվաթիայի ազգային թիմի գլխավոր մարզիչ Զլատկո Դալիչը։ Վերջինս տակտիկական գաղտնիք է բացել, հայտարարելով, որ Լիոնել Մեսիի նկատմամբ անհատական հսկոսություն չի սահմանելու․ «Մեսիի նկատմամբ անհատական վերահսկողություն չենք սահմանի։ Նա շատ է սիրում տեղաշարժվել խաղադաշտում, ուստի մենք պաշտպանական օղակում զգոն և կազմակերպված կգործենք։ Պետք է համախմբված և կարգապահ խաղանք պաշտպանությունում»։
Նշենք, որ 35-ամյա Մեսին ընթացիկ առաջնությունում դարձել է չորս գոլի հեղինակ: Նա լավագույն ռմբարկուների պայքարում մեկ գնդակ է զիջում իր ակումբակից, Ֆրանսիայի հավաքականի հարձակվող Կիլիան Մբապեին, որը 5 գոլով առաջատարն է: «Սպասու՞մ եմ Մեսիի դեմ խաղին։ Առաջին հերթին հպարտ եմ, որ նորից խաղալու եմ աշխարհի առաջնության կիսաեզրափակչում և խաղալու եմ մեծ թիմի դեմ։ Սա է կարևորը, այլ ոչ թե պարզապես խաղալ մեկ ֆուտբոլիստի դեմ։ Իհարկե, Լիոնել Մեսին Արգենտինայի լավագույն ֆուտբոլիստն է, և մեզ համար շատ դժվար կլինի նրան կանգնեցնել, բայց մենք պատրաստվել ենք և պատրաստվում 100 տոկոսով ներդնել մեր ուժերը։ Հուսով եմ, որ դա բավարար կլինի եզրափակիչ դուրս գալու համար։Բոլորն ուշադրություն են դարձնում մեծ հավաքականներին, իսկ մենք փոքր երկիր ունենք, ոչ ոք մեզ լուրջ չի ընդունում, բայց մեզ համար խնդիր չէ ֆավորիտների ստվերում լինելը։Իհարկե, մենք կցանկանայինք ավելի շուտ ավարտել հանդիպումները և չանցնել 11-մետրանոցների շարքը, բայց մենք պատրաստ ենք անել հնարավորը հաղթելու համար»,- ասել է Խորվաթիայի հավաքականի առաջատար և ավագ Լուկա Մոդրիչը։ Այո, ֆուտբոլային աշխարհը սպասում է համաշխարհային ֆուտբոլի երկու գիգանտների, երկու տաս համարների Մոդրիչի և Մեսիի դիմակայությանը։ Այս ֆուտբոլիստների փայուն խաղի ու մեծ ջանքերերի շնորհիվ Խորվաթիան և Արգենտինան կիսաեզրափակչում են։
Ինչևէ, այսօրվա հանդիպման գլխավոր մցավարը կլինի իտալացի Դանիելե Օրսատոն։ Այս առաջնությունում Օրսատոն կսպասարկի Արգենտինայի թիմի մասնակցությամբ երկրորդ հանդիպումը։ Խմբային փուլում նրա մրցավարությամբ արգենտինացիները 2:0 հաշվով հաղթել էին Մեքսիկայի թիմին։Արգենտինա – Խորվաթիա զույգի հաղթողը եզրափակիչում կմրցի աշխարհի չեմպիոն Ֆրանսիայի եւ Մարոկկոյի հավաքականների դիմակայության հաղթողի հետ։ Այդ խաղը տեղի կունենա դեկտեմբերի 14-ին։