Քաղաքացիական հագուստներով մի խումբ ադրբեջանցիներ կրկին բնապահպանական պատճառաբանությամբ առավոտյան՝ ժամը 10:30-ի հատվածում, փակել են Ստեփանակերտ-Գորիս մայրուղին: Միջադեպի վերաբերյալ պատշաճ տեղեկացված է Արցախում տեղակայված ռուսական խաղաղապահ զորակազմի հրամանատարությունը: Ադրբեջանցի «քվազի էկոակտիվիստները» պահանջում են հանդիպում Արցախում ռուսական խաղաղապահ զորախմբի հրամանատար Անդրեյ Վոլկովի հետ։ Նրանք պնդում են, թե շաբաթ օրը խափանվել է բնապահպանական մոնիթորինգը, որը պետք է իրականացվեր Արցախի հանքավայրերում։ Թեմայի շուրջ «Առաջին լրատվական»-ը զրուցել է տարածաշրջանային փորձագետ Արմեն Պետրոսյանի հետ:
Պետրոսյանի խոսքով՝ Ադրբեջանը այնքան է շարունակելու սադրանքները, քանի չի լուծել իր առջև դրված խնդիրները․ «Խոչընդոտներ ստեղծելով Լաչինի միջանցքում, ադրբեջանցիները փափուկ եղանակով ցեղասպանելու նպատակ են հետապնդում: Նոր ռազմական էսկալացիան Ադրբեջանի օրակարգից չի հանվել: Ձմեռային պայմաններում նման սադրանքները Ադրբեջանին ավելի ձեռնտու է: Ադրբեջանը այս սադրանքները պահպանելու է մինչև 2023-ի ապրիլ-մայիս, հնարավոր է ունի Թուրքիայի հովանավորությունը»:
Փորձագետը հիշեցրեց, որ Արցախի համար ուղիղ պատասխանատվություն է կրում ՌԴ-ն նոյեմբերի 9-ով ստանձնած պարտավորությամբ․ «ՌԴ-ն ոչ թե չի ուզում, այլ չի կարողանում ապահովել արցախահայության անվտանգությունը:Ադրբեջանը թույլ չի տա ՌԴ-ն շունչ քաշի, սադրանքներով մի քանի խնդիր է լուծում»:
