Կառավարությունն առաջարկում է ստեղծել Ներքին գործերի նախարարություն, որին ենթակա մարմիններ կլինեն Ոստիկանությունը, Միգրացիայի և քաղաքացիության ու Փրկարար ծառայությունները: Այս փոփոխությունով 5 հիմնական գործառութային ոլորտ են առանձնացնում՝ հասարակական կարգի պահպանություն, հանցագործությունների կանխում և բացահայտում, որը գալիս է ոստիկանական բլոկից, աղետների ռիսկի կառավարում՝ սա գալիս է ԱԻՆ նախարարի բլոկից, միգրացիա և քաղաքացիություն, պետական ռեզերվների կառավարում, հումանիտար հարցեր: Արդարադատության նախարարի տեղակալ Արփինե Սարգսյանը նշում է, որ օրենքի ընդունվելու դեպքում Ներքին գործերի նախարարության ենթակայությանը կհանձնվեն նաև Ոստիկանության կրթահամալիր և Ճգնաժամային կառավարման պետական ակադեմիա ՊՈԱԿ-ները, իսկ ոստիկանապետը, Փրկարար ծառայության և միգրացիոն ծառայության պետերը կլինեն ներքին գործերի նախարարի տեղակալները:
Այս առնչությամբ ՆԳ նախկին նախարար, Հանրապետություն կուսակցության անդամ Սուրեն Աբրահամյանն «Առաջին լրատվական»-ի հետ զրույցում դրական գնահատեց փոփոխություն՝ նշելով. «Պատերազմը չավարտված երկրի պայմաններում ինչքան այդ կառույցները միասնական լինեն, ինչքան կենտրոնաձիգ լինի իշխանությունը, այնքան ավելի արդյունավետ կարող է լինել: Այդ ժամանակ լրիվ ուրիշ տրամաբանություն, ուրիշ փիլիսոփայություն է գործում: Ինչքան մասնատեցիր, այնքան ավելի կորցնելու ես, այնքան ավելի թուլացնելու ես երկրի անվտանգությունն ու պաշտպանողականությունը:
Այնպես որ ընդհանուր դրական եմ գնահատում այդ համախմբումը, ՆԳ նախարարության ստեղծումը: Ժամանակին սխալ եմ համարել տարանջատումը: Ես հիմիկվա փոփոխության նպատակը չգիտեմ, բայց մինչ այդ ՆԳՆ-ի հետ վարվել են իշխանությունների զուտ քաղաքական նպատակահարմարությունից, իշխանությունը պահելու նպատակից ելնելով: Ռոբերտ Քոչարյանը հենց դրա համար քանդեց ՆԳՆ-ն: Իսկ հիմա ՆԳՆ-ի ստեղծումը դրական եմ համարում: Ինչքան այդ կառուցները միասնական լինեն, այնքան ավելի հեշտ կլինի ընդհանուր թշնամուն դիմագրավելու հարցում: Այս պարագայում ժողովրդավարություն, մարդու իրավունքներ անցնում են երկրորդ պլան»:
Ինչ վերաբերում է Նիկոլ Փաշինյանի հայտարարությանը, թե այս փոփոխության ամենախորքային և հեռանկարային իմաստը նոր ստանդարտի ոստիկանություն և նոր ստանդարտի փրկարար ծառայություն ունենալն է, Սուրեն Աբրահամյանն ասաց. «Ես չգիտեմ, թե դրանք ինչ նոր ստանդարտներ են, ես չգիտեմ՝ իրենք ինչ նկատի ունեն: Շատ հաճախ վերադառնում են հնին «նոր ստանդարտներ» անվան տակ: Ընդհանրապես ես կողմնակից եմ միասնական համակարգ ունենալուն: Ի՞նչ է նշանակում՝ ամեն մի ծառայություն իր քննչական ծառայությունն ունի: Դրանք ոչ մեկն ի շահ պետության ամրության համար չեն արել, քաղաքական շահի համար են արել: Հիմա, որ համախմբում են, ճիշտ են անում, բայց թե ինչ նպատակով, ես չգիտեմ: Ինձ համար նպատակը երկրի անվտանգության ապահովումն է և չավարտված պատեևրազմի պարագայում կենտրոնաձիգ իշխանություն լինելը»:
Հարցին, թե նախկինում ի՞նչ հիմնավորմամբ վերացրին ՆԳ նախարարությունը, Սուրեն Աբրահամյանը պատասխանեց. «Միշտ իշխանությունները վերամբարձ ոճով տարբեր բաներ են ներկայացնում: Այն ժամանակ իբր թե ՆԳ նախարարությունը անկառավարելի հզոր մի կառույց էր, իրենք երկրին հնարավորություն են տալիս շնչելու, ոնց որ ՆԳՆ-ն երկրի թոքերը լինեն: Դրա համար քաղաքական նպատակով, որպեսզի ընդդիմությունը մի քիչ շատ չխոսի՝ դարձրեցին ծառայություններ: Հետո նաև Եվրոպայից որոշակի պահանջներ եղան, դրանից ելնելով էլ վերցրեցին անոռուգլուխ կառույցներ սարքեցին՝ Հատուկ քննչական ծառայություն, ՊԵԿ-ն ունի իր քննչական ծառայությունը, ԱԱԾ-ն նույնպես ունի: Մասնատեցին ՆԳՆ:
Չի կարելի նման բան անել: Խաղաղ Շվեյցարիայի կամ Հոլանդիայի պարագաներում ուրիշ չափանիշներ են լինում՝ մարդու իրավունքներ, դեմոկրատական սկզբունքներ, վերահսկելիություն, իսկ կռվող երկրի պարագայում կենտրոնաձիգ միասնական կառույցներ պետք է լինեն»:
