Թուրքիան շարունակում է պայքարել իր շահերի ու ապագայի համար, ինչպես մեկ դար առաջ էր՝ Ազգային-ազատագրական պատերազմի ժամանակ։ Այս մասին հայտարարել է Թուրքիայի նախագահ Ռեջեփ Թայիփ Էրդողանը երկրի հյուսիսում՝ սևծովյան Սամսուն նահանգում մի շարք օբյեկտների բացման ժամանակ, հայտնում է Անադոլու գործակալությունը։
Նրա խոսքով՝ Անկարայի հակառակորդները չեն հրաժարվում Թուրքիայի զարգացման համար խոչընդոտներ ստեղծելու փորձերից՝ օգտագործելով նաև «ահաբեկչության քարտեզը»։
«Սակայն նրանք մոռանում են, որ ժամանակակից Թուրքիան այլևս դրսի պատվերով գործող պետություն չէ, այլ երկիր, որն ինքն է ուղղորդում և հրամաններ տալիս մյուսներին։ Հակաթուրքական սցենարների փլուզման բանալին ժողովրդի և իշխանությունների միասնությունն է»,- ընդգծել է Էրդողանը։
Նրա խոսքով՝ յուրաքանչյուր համաշխարհային ճգնաժամ հնարավորություն է տալիս ավելի լավ հասկանալ Թուրքիայի հզորությունը։
«Վերջին 20 տարիների ընթացքում Թուրքիայի տնտեսությունը եռապատկվել է, բայց դա բավարար չէ։ Մենք վճռական ենք կարճ ժամանակում կրկնապատկելու ՀՆԱ-ն՝ Թուրքիան ընդգրկելով աշխարհի առաջատար տնտեսությունների տասնյակում»,- վստահեցրել է նա։
Էրդողանի խոսքով՝ Թուրքիան դարձել է մի պետություն, որի գործողություններին ուշադրությամբ հետևում են ամբողջ աշխարհում։ Նա նաև ուշադրություն է հրավիրել տարածաշրջանում, այդ թվում՝ Ուկրաինայում Թուրքիայի միջնորդական ջանքերի վրա։
Էրդողանը հայտնել է, որ կիրակի օրը՝ դեկտեմբերի 11-ին, հեռախոսազրույց կունենա ՌԴ նախագահ Վլադիմիր Պուտինի հետ, որից հետո կզրուցի արդեն իր ուկրաինացի գործընկեր Վլադիմիր Զելենսկու հետ։
«Մենք կքննարկենք հետագա քայլերը տարածաշրջանում»,- նշել է Թուրքիայի նախագահը։
Էրդողանը հավելել է, որ հենց Թուրքիայի ներդրման շնորհիվ է բացվել «հացահատիկային միջանցքը», որով գյուղատնտեսական արտադրանքն առաքվում է աշխարհի տարբեր ծայրեր։
