Գյումրի քաղաքի ՔՊ-ական ավագանի, Շիրակի մարզպետի եղբայր Արման Բաղդասարյանը, որը վերջերս ուժի կիրառմամբ բերման էր ենթարկվել ոստիկանություն, ապա ազատ արձակվել, հայտարարել է ավագանու անդամի մանդատը վայր դնելու մասին։
«Հիմք ընդունելով ՏԻՄ օրենսգրքի 22-րդ հոդվածի 8-րդ կետը՝ այսօր դիմում եմ ներկայացրել Գյումրու համայնքապետին, որպեսզի վաղաժամկետ դադարեցվի Գյումրի համայնքի ավագանու անդամի իմ լիազորությունը»,- իր ֆեյսբուքյան էջում գրել է Բաղդասարյանը՝ պարզաբանելով․ «Որոշումը կապված է նախ և առաջ ՔՊ վարչության վերջին նիստին քաղաքական պատասխանատվության սկզբունքի վերահաստատման հետ: Ի՞նչ ասել է քաղաքական պատասխանատվություն, ես ինքս այդ սկզբունքը ակտիվ առաջ եմ տարել, որը ավագանու մակարդակում իրենից ենթադրում էր՝ համաձայն չես թիմի որոշման հետ, անում ես չհամաձայնեցված քաղաքական հայտարարություններ, հանրային վատ վարք ես դրսևորում, կատարել ես որևէ հակաօրինական գործողություն, ապա թվարկվածներից որևէ մեկի առկայության դեպքում բարի եղիր դնել մանդատը:
Իմ պարագայում հավանաբար դա կա՛մ ժամանակին կուսակցությունից դուրս գալն է եղել, կա՛մ քաղաքային իշխանությանը սուր քննադատելը (բացատրություն չեմ ստացել):
Անկախ այն հանգամանքից, որ այս պահին ես կուսակցական չեմ (2022թ ապրիլից), այս սկզբունքները ամրագրվել են շատ ավելի շուտ (2021թ հոկտեմբեր ամսին), ու ես երբեք իմ խոսքից ու սկզբունքներից հետ չեմ կանգնում:
Շնորհակալություն բոլոր գործընկերներին համագործակցության համար, մաղթում եմ բեղմնավոր աշխատանք:
Նաև խոստացածի համաձայն՝ կանդրադառնամ իմ ձերբակալմանը, բայց ոչ հիմա»:
