Մոսկվայի դատարանում երեկ տեղի է ունեցել «1921թ․ մարտի 16-ի Մոսկվայի ռուս-թուրքական «բարեկամության և եղբայրության մասին» պայմանագրի օրինականության, վավերականության և իրավազորության հարցերով հայցադիմումի հերթական նիստը: Հայցադիմումը դատարան ներկայացրել է Համառուսաստանյան հայերի միության հասարակական կազմակերպության Կեմերովոյի մարզային բաժանմունքի նախագահ` Գեորգի Անտոնովը: Նիստից հետո Գեորգի Անտոնովը «Առաջին լրատվական»-ի հետ զրույցում նշեց, որ ՌԴ ԱԳՆ-ն երեք միջնորդություն էր բերել, որ վարույթը չհասնի նրան, որ դատարանը որոշում կայացնի:
«Երեք միջնորդությանն էլ ես դեմ արտահայտվեցի, և դատարանը մերժեց դրանք: Եթե դատարանը բավարարեր այդ միջնորդությունները, վարույթը տեղի չէր ունենա: Մենք դեռ նախորդ նիստին միջնորդել էինք, որ դատարան բերվեն պայմանագրերի բնօրինակները, նաև հավելվածները: Դատարանը պարզաբանեց, որ եթե ես դրանք պահանջեմ, 6 ամսից մեկ տարի կտևի, մինչև ԱԳՆ-ն բերի դրանք, ձեզ պե՞տք է, որ այդքան երկարի հարցի քննարկում: Դատարանը ժամանակ տվեց մտածելու, ես էլ ասացի, որ դա մեզ պետք չի, մեզ պետք է, և այսքանը, որ ռուսական ատյաններում կարողացել ենք անել, դա արդեն մեծ քայլ է: Դատարանը որոշեց մերժել մեր միջնորդությունը, իսկ այդ մերժումը մեզ համար մեծ պլյուս է, առիթ է, որ մենք հետագայում պրոցեսը շարունակենք: Քննարկումները նորմալ էին ընթանում, նույնիսկ առարկություն չէին բերել, բայց ամեն գնով ասում էին, որ իրենք ճիշտ են, որ իրենք կարող էին ընդհանրապես չպատասխանել: Երկրի նախագահը պատասխանել է, Պետական դուման պատասխանել է, իսկ ԱԳՆ-ն ասում է՝ մենք կարող ենք չպատասխանել, մեր բոլոր փաստաթղթերը գաղտնի են, մենք դրանք քաղաքացիների հետ չենք կիսում: Ես դատարանում էլ ասացի՝ էդ նախագահը գաղտնի չէ, դուք գաղտնի՞ եք: Էդպես բաժանվեցինք, ինձ թվաց, որ դատարանը որոշում կկայացնի, ԱԳՆ-ին կպարտադրի, որ ներկայացնի պատասխաններ մեր հարցերին: Դատավորը եկավ և հայտարարեց, որ մեր հայցը մերժում է: Բայց մենք արդեն մեկ ժամից ավել հարցը քննարկել էին: Առաջին անգամ այս մեկ տարի տևած դատական պրոցեսում մեր հայցը, ըստ էության, քննարկվեց: Պարզաբանումը, թե ինչու դատարանը չհանձնարարեց ԱԳՆ-ին տալ պատասխան, դա կիմանանք մեկ ամիս հետո, երբ դատարանը փաստաթղթով կտա իր պարզաբանումները»,-ասաց նա :
Անտոնովի խոսքով՝ հենց դատարանի տված այդ թղթի հիման վրա մենք կիմանանք, թե ինչ պատճառով ԱԳՆ-ին չի հանձնարարել այդ պայմանագրերը դիտարկել ըստ էության և դենոնսացնել դրանք:
«Մեկ ամիս հետո կստանանք դատարանի որոշումը և բողոքարկման հնարավորություն կստանանք: Փաստորեն մենք կունենանք դատարանի որոշում, որը մինչև հիմա չենք ունեցել: հաջորդ ատյանը վերաքննիչ դատարանն է, ապա Գերագույն դատարանը, որից հետո միջազգային դատարանը: Դատարանի որոշումը մեզ հիմք է տալիս, որ բոլոր դատական ատյաններ անցնելու հետո հասնենք միջազգային դատարան»,-հավելեց Անտոնովը:
Նա նաև նշեց, որ իրենք տրամադրված են գնալ մինչև միջազգային դատարան:
«Սա ևս մեկ քայլ է, որ մենք հասնենք մեր նպատակին: Ռուսաստանի հայերի միության գրած բոլոր բողոքները, կլյաուզաները, բոլորը բերել էին դատարան, որ գործին կցեն: Ես ասացի՝ Մոսկվայի աղբանոցներում ուրիշ թղթեր չկայի՞ն, որ հավաքեիք, բերեիք: Դատավորն իրենց ասաց՝ ձեր թղթերը հետ վերցրեք: Այդ աստիճանի ստոր էին, որ ամեն ինչ արել էին, որ դատարան ստից թղթեր բերին: Արա Աբրահամյանն իր հակահայկական դեմքը պարզ ցույց տվեց, ոչ մի հայկականություն իր մեջ չկա»,-ասաց նա:
