Գրեթե անհնար է պատկերացնել, որ տեսանելի ապագայում հայ-ադրբեջանական խաղաղության պայմանագիրը կստորագրվի, որովհետև թե կողմերի միջև կա լրջագույն իրարամերջ մոտեցումների իրողությունը, թե նաև միջնորդ դերակատարների, որոնք փորձում են տարբեր դիվանագիտական նախաձեռնություններով կողմերին մոտեցնել այդ պայմանագրին: Այս մասին «Առաջին լրատվական»-ի տաղավարում նշեց քաղաքագետ Հակոբ Բադալյանը:
Նա հնարավոր համարեց, որ Փաշինյան-Ալիև հանդիպումը տեղի ունենա Սանկտ-Պետերբուրգում. «Մենք գիտենք, որ տարեվերջին Սանկտ-Պետերբուրգում տեղի է ունենում ԱՊՀ ոչ պաշտոնական վեհաջողոը: Հնարավոր է, որ դրա շրջանակներում Ռուսաստանին հաջողվի կողմերի միջև քննարկում ծավալել, առավելևս, որ հայտարարությունները, նշանները դրա հավանականության մասին խոսում են: Թեպետ վստհաբար պնդել, որ կլինի այդպիսի հանդիպում, չենք կարող, բայց այն, որ դրա ուղղությամբ լրջորեն աշխատանք է տարվում, դրա մասին վկայում է Պեսկովի հայտարարությունը: Սա նշանակում է, որ Ռուսաստանի մակարդակով այդպիսի հանդւիպում կազմակերպելու նպատակ դրված է»,-ասաց նա:
