Ադրբեջանի պետական հեռուստաընկերությունը հայտնել է, թե այդ երկրի բնապահպանության նախարարության և Ազերգոլդ ընկերության մասնագետները հերթական անգամ եղել են Արցախում ու Իվանյանում՝ նախկին Խոջալու, որտեղ ռուս խաղաղապահների կենտրոնակայանն է, հանդիպել են խաղաղապահների հրամանատարների հետ: Ըստ այդ հաղորդագրության, քննարկել են, իրենց բնորոշմամբ «ժամանակավոր տեղակայված խաղաղապահների պատասխանատվության գոտում բնապահպանական և օգտակար հանածոների ապօրինի շահագործման» հետ կապված մտահոգություններ:
Ադրբեջանն այս թեման օրակարգ է բերել դեկտեմբերի 3-ին Լաչինի միջանցքը փակելով, որը բացվեց մի քանի ժամ անց: Անկասկած է, որ «բնապահպանական» թեման ոչ միայն միջանցքի հանդեպ սադրանքի առիթ էր, այլ թերևս նաև ադրբեջանական քաղաքական-դիվանագիտական գործողությունների մարտավարական ուղղություն: Արցախում ներկայումս գործում է Կաշենի լեռնահարստացուցիչ կոմբինատը, որը պատկանում է Վալեքս ընկերությունների խմբին: Կաշենի հանքը շահագործվում է այն բանից հետո, երբ սպառվեցին Դրմբոնի հանքի պաշարները, որը շահագործում էր նույն ընկերությունը:
44-օրյա պատերազմի հետևանքով Կաշենի հանքի շահագործումը դադարեցվեց, քանի որ հարստացուցիչ կոմբինատի պոմպակայանը մնացել էր Ադրբեջանի վերահսկողության տակ անցած տարածքում: Հանքի շահագործումը վերսկսել է նոր ենթակառուցվածք կառուցելուց հետո: Այն, որ Ադրբեջանը թիրախավորելու է հարցը, պարզ էր դեռևս 2021 թվականին Ալիևի ելույթից, որտեղ նա խոսում էր այն մասին, թե Ադրբեջանը փոխհատուցում է պահանջելու Արցախի տարածքում հանքեր շահագործած ընկերություններից, դիմելու է դատարան: Այժմ կարծես թե Բաքուն անցել է կոնկրետ գործողությունների, ինչը անկասկած թե տնտեսական, թե քաղաքական մարտահրավեր է Արցախի համար:
Ավելորդ է մեկնաբանել, թե պատերազմի հետևանքով այդ թվում տնտեսապես խոցված Արցախի համար ինչ կարևորություն ունի տնտեսական յյուրաքանչյուր ռեսուրս, առավել ևս խոշոր հանքարդյունաբերական նախագիծը: Ադրբեջանը փաստացի թիրախավորում է այն, ինչի համատեքստում էլ նաև պետք է դիտարկել թերևս Լաչինի միջանցքի հարցի սրումը, որը Արցախի հանքարդյունաբերական արդյունքի արտահանման միակ ճանապարհն է: Արցախի իշխանության կառույցները մասնակցու՞մ են ռուս-խաղաղապահների և ադրբեջանցիների «բնապահպանական» քննարկումներին, թե՞ ոչ:
Լուսանկարը՝ hetq.am-ի
